حوار شادية مشوق مع الاعلامية نجوى الطوبي في برنامج اعده الناقد والكاتب الصحفي الاستاذ محمد سعيد واذيع لاول مرة في 2 فبراير 1978

مهرجان النجوم
الجزء الاول...

• صديقي المستمع اهلا بك في هذا اللقاء الجديد .. ويسر البرنامج ان يستضيف نجما جديدا... ولقاء اليوم مع صوت مصر الفنانة شادية........ الفنانة شادية.. اهلا بيكي في البرنامج

•
اهلا وسهلا...


• الاول باقولك كل سنة وانتي طيبة بمناسبة العيد.. ودايما البرنامج بيبتدي في بداية لقاؤة بضيفه الفنان بيسأله عن اهم الشخصيات اللي لعبت ادوار في رسم ملامحه الشخصية والفنية... فنقدر نقول بالنسبة للفنانة شادية هل فيه شخصيات كان لها اثر هام في حياتك؟

•
اولا كل سنة وانتوا طيبيبن .. وعيد يارب يبقى عيد علينا كلنا يارب ... وعيد كويس ويبقى وشه كويس عليكو..... طبعا كل فنان او كل انسان وهو طفل فيه شخصيات كتيرة بتأثر عليه.. انا اتاثر اوي بالحاجات اللي... يعني مثلا وانا صغيرة.... انا حابتدي من هنا ومن هنا... حياتي الشخصية وحياتي الفنية..... وانا صغيرة اتعلمت الحنية من امي .. ومن بابا الحنية والشخصية.. يعني بابا كان يدينا حنية .. وفي الوقت نفسه كنت اخاف اضحك قدامه.... يعني التربية .. اللي الواحد بعد ما كبر بيعرف.... يعني التربية .. الاسرة الحقيقية اللي بتعرف تربي اطفالها ازاي...... موقف انا عمري ما انساه لغاية النهاردة.... كان وانا صغيرة يعني.. شفت موقف... شفت حاجة في البيت... فكنت باحكيها لواحدة صاحبتي.... حاجة حصلت في البيت... فخالتي سمعت وانا باتكلم... اخدتني جوه في الاوضة ... رنتني علقة حلوة.. وقالت لي شوفي... لما تسمعي او تشوفي أي حاجة مش بتاعتك... يعني حد تاني .. ما تحكيهاش لحد ..... لانك تبقى بنت مش كويسة ومش امينة.......... حتى انا افتكر يومها قعدت من الضهر لغاية المغرب تحت السرير زعلانه... وقعدوا يدوروا عليا.. بعديها جت... مسكتني وباستني وقالت لي... دي لمصلحتك وبتاع...... انا من يومها... يعني الحاجات اللي بتاثر في الانسان ودي حاجات حلوة بتاثر في الطفل انما بتفضل معاه.. لان الطفل بيتأثر... يعني الواحد مش وهو كبير بيتعلم... وهو صغير بيبقى اساس.... اساس بيمشي عليه.... الى الان انا لو سمعت أي حكاية.. أي انسان او شفت أي حاجة مش خاصة بيا انا... انا حرة احكي مثلا اللي انا عايزه احكيه عني انا .... انما أي اسرار ناس تانية ما احبش احكيه ابدا... وده اللي استفدته كمان من حكمت خالتي...
.

• الحقيقة يعني حضرتك قلتي درس ببساطة شديدة لكن درس في الاخلاق ممكن يكسبه الطفل بالفعل وقد كده الاسرة بيكون لها تأثير على اطفالها... ومعني كلام حضرتك برضة انك بتؤمني بالتاثير والتأثر في العلاقات بين الناس... ده بيخليني اسالك... لو تركنا الناحية الشخصية وانتقلنا للناحية الفنية نقدر نقول للاسرة والعائلة كان لهم فضل فيتوجيه اهتماماتك للنواحي الفنية؟

•
قبل التوجيه طبعا... انا.. وانا من صغري كنت احب اوي اغني وامثل... حتى اما كنت باشوف فيلم اجي قدام المراية واقعد اغني وامثل وبتاع .. ماعرفش كنت باقول ازاي طبعا... اللي اثرت فيا او شجعتني اكتر او فتحت نفسي اكتر اختي عفاف.... اختي عفاف كان صوتها حلو اوي... انتي عارفة هي كانت فنانة يعني اعتزلت الفن..... كنا تمللي نغني مع بعض يعني مثلا انا فاكرة من الاغاني اللي كنا نغنيها... كان فيه.. يادي النعيم اللي انت فيه يا قلبي... كانت هي تعمل عبد الوهاب وانا اعمل ليلى مراد.... فدي فتحت نفسي اكتر واكتر.. يعني في اليوم ما كانش يفوت اليوم.. غير لازم نكون غنينا كذا غنوة.... يعني دي اثرت فيا اوي.......


• وبالنسبة لباقي افراد الاسرة.. يعني بالنسبة لاختك كان فيه هواية مشتركة بتجمعكم.. لكن بالنسبة للكبار في الاسرة.. مثلا الاب او الام كان لهم اهتمامات فنية واثرت عليكي؟؟

•
طبعا ... اللي كان له الفضل الاكبر واللي راعاني واللي وجهني.. بابا... وبابا يعني.... بابا كان صوته حلو جدا.. يعني جميل حقيقي صوت حلو... حتى اما كان ييجو قرايبنا تمللي.. لنتي عارفة بيبقى فيه مقابلة وبتاع كل اسبوع هنا وهنا... قرايب يعني... كان قعدتهم تمللي... وكان فيه عود... يقعدوا يضربوا وبابا يغني " النيل نجاشي" و " مريت على بيت الحبايب".... كان صوته حلو اوي.... بابا ما كانش يعرف ان انا ... انا كنت اخاف اغني قدام بابا... يعني.. انتي عارفة عادات زمان والتقاليد والحاجات دب.... مش ممكن أجي قدام بابا واقعد اغني... اخاف... ففاتت ايام وجت ايام... قاعدين قعدة فتيزا قالت غني بقى .. ياللا فاطمة تغني.. انا كان اسمي فاطمة.. طبعا انتي عارفة اسمي فاطمة.... فقال هي بتعرف تغني؟..... قالت طب نسمع... فرحت مغنية بتبص لي كده لي لليلى مراد..... بابا ابهر بصوتي... بقى مبهور... ازاي انا عندي بنت وصوتها حلو بالشكل ده وبتاع... فرح.. يعني فرح.... ابتدى بقى يوجهني الاتجاه الصح.... يعني جاب لي واحد يعلمني عود كان اسمه اظن محمد ناصر ولا ايه.. الله يرحمه يعني... ووداني ل.. ل.. فريد غصن عشان يديني صولفيج لصوتي بالبيانو.... يعني كان معجب بيا... فاهمه...يعني مرة واحدة... ما اتفاجئش بيا وانا طفلة.. اتفاجأ مرة واحدة بنته بتغني....وبعدين هو احسن واحد شجعني في شغلي ووقف جنبي الحقيقة... وامي طبعا بلرعاية والحنية.. وعلى صحتي... يعني انا كنت باشتغل في 3 افلام في شهر واحد ... طب دي عايزة رعاية ... الوقت كله.. كنت بانام ساعتين تلاته.... انما برعايتهم ليا.. وبفيتامينات... ويخافوا آخد برد....والغذا الكويس وكله... يعني هما اللي وقفو جنبي...
.

• طب لو رجعنا برضة لمرحلة الدراسة.. حضرتك قلتي ان والدك فوجئ بيكي وانتي بتغني كان في سن كام؟ وهل كان الفترة دي في اثناء دراستك ؟ وبرضة تاثير المدرسة عليكي وتشجيعك نحو الفن؟

•
بابا عرف صوتي وانا عندي 8 سنين تقريبا......... في المدرسة بقى.. كانت ابلة ليلى مدرسة المحفوظات كانت تموت في صوتي... فما كناش نقعد في الفصل مثلا.. ما كناش يعني كان فيه حاجات.. يعني اناشيد بنقولها.. انا فاكرة منها حتت بس مش فكرة الكلام... فكانت توقفني وتخليني اغني " بتبص لي كده ليه" و " حجبت ليه نورك عني" بتاعة ليلى مراد برضه... والبنات كلهم قاعدين ساكتين وهي قاعدة تسمعني... لدرجة... كانت معجبة بصوتي .. اخدتني بجراءة ودتني اوضة الناظرة... الناظرة دي كنا نخاف منها جدا يعني... يعني داخلين اوضة الناظرة يا حنتعاقب يا حنتشتم يا أي حاجة...... فدخلت وقالت لها انا عايزة اسمعك مفاجاة رجوكي انك تسمعيها.... وابتديت وانا بارتعش باغني قدامها وما ببصش في وشها ومغمضة كده.... فالحقيقة هي كمان شجعتني... وبعدين ما نجحتش في أي حاجة في المدرسة الا في المحفوظات........
.

• قبل ما تصبحي شادية المطربة.. كان لفاطمة شاكر اهتمام او حب ببعض الاصوات الفنانين المشهورة.. حضرتك قلتيلي او ذكرتيلي اكتر من مرة في اثناء الحديث انك كنتي بتقلدي ليلى مراد يا ترى كان ده الصوت الوحيد اللي بتحبيه ولا كان فيه اصوات اخرى بتحبيها برضة؟

•
لأ حقولك.... طبعا حقولك ام كلثوم... مش حقولك انا كنت معجبة بيها.. انا كنت فاكرة ام كلثوم دي يعني... اول ما اتولدت باسمع صوتها.. زي الهوا .. زي الشمس.. يعني حاجة في حياتنا.. يعني دي م الاسباب اللي بنعيش بيها برضة... يعني ام كلثوم دي سيبيها على جنب.. حقيقي... وما اقدرش مثلا ان انا اوصل.... اقدر اغني حاجة لام كلثوم... ام كلثوم باتنفس بيها ..باسمعها.. انما اللي كنت اقدر اقلدها مثلا وبتاع ومعجبة... كانت ليلى مراد الحقيقة.... واسمهان... اسمهان كنت احبها اوي... بس اللي كنت باقدر اقلدها ... ليلى مراد...


• وبالنسبة للسيدة ام كلثوم كان موقفها منك ايه يا ترى بعد ما نجحتي واصبحتي مشهورة؟

•
الحقيقة هو فيه موقف..... انا بعد ما شتغلت سنه سنتين... بابا قاللي تعالي حنروح زيارة... هو يعرف انا باموت في حاجة اسمها ام كلثوم.... فقلت له طيب واخدني... لقيت نفسي في فيللا... ما كنتش اعرف دي فيلتها ولا أي حاجة.... عرفت اما وصلت ان ده بيت ام كلثوم....... ارتعشت الحقيقة... يعني خفت ... يا بابا... قاللي معلش شوفي دلوقتي.... اولا فرحانه يعني.... بابا عامللي مفاجاة حلوة يعني... قعدنا في الصالون صغير كده.... كان فيه الصالون الاولاني ده...ودخلت ام كلثوم......... يعني ايه دي.... مش مصدقة ان.... انا كنت زمان وانا طفلة شفتها عند ناس و حاجات من دي وقعدت تحت رجليها وكله .... قبل ما اشتغل.. كنت طفلة لسه......... فقعدت مش عارفة اكلمها..... ف.. بابا بقى اللي اتكلم... قالها بنتي متاثرة بيكي جدا وطبعا أي كلمة حضرتك حتقوليها هي حتستفيد منها... فارجوكي هي بنتي بتحب الفن و بتشتغل وهي دلوقتي بقى لها سنه بتشتغل.... انا عايز توجيهاتك يعني..... شوفي بابا اد ايه كان بيراعيني.... الحقيقة يعني.... فابتدت تكلمني... قالت لي انتي بتحبي... ليه اشتغلتي؟ عشان بتحبي تغني مثلا ولا بتحبي تمثلي ولا عايزة الناس يشاوروا عليكي ويقولوا شادية اهيه ولا بتاع .. اسمك يبقى مشهور.... قلت لها والله ابدا.. انا باحب اوي.. احب باغني.. احفظ الغنوة.. من نفسي كده احب باقولها... وباحب امثل .. يعني احب امثل.............. قالت لي انا شفت منك انك انتي بتحبي شغلك... انتي اذا كنتي عايزة تفضلي وتستمري وكله اعبدي شغلك بعد ربنا.... ربنا فوق......... وشغلك ده احترميه وحبيه وحافظي عليه ... وحافظي على صحتك وعلى صوتك.. انتي ساعتها حتستمري ويجوز حتضحي بحاجات كتيرة.. مثلا انتي دلوقتي عايزة تخرجي تتفسحي تروحي تيجي معندكيش وقت بتشتغلي... مدام بتحبي شغلك حتكوني سعيده اكتر لو اتفسحتي وروحتي وجيتي..... دي النصيحة الحلوة اللي اخدتها من ام كلثوم.........
...
مهرجان لنجوم
الجزء الثاني

• الفنانة شادية .. من المعروف ان اول افلامك السينمائية العقل في اجازة كان مع الموسيقار الراحل محمد فوزي... اسألك عن اثر محمد فوزي في مشوار شادية في فترة البداية ؟؟

• الله يرحمه... الاستاذ فوزي خدمني خدمة كبيرة جدا... هو فنان حقيقي كان عظيم.. وله اثر في الموسيقى المصرية ... الحقيقة يعني... له بصمة من بصماته... لون.. لون جديد طلع بنغمة جديدة.. وكتير مشيوا عليها يعني..... هو اللي فهم صوتي.. فهم امككانيات صوتي... يعني لو واحد لحن لي ايامها... كان فيه مطربات يغنوا وبتاع ... الغناء... كل واحدة عايزة تقلد ام كلثوم يعني... ومازالوا فيه يعني... انما هو فهم صوتي... ف... اداني الاغاني الخفيفة اللي تمشي مع طبقات صوتي.. فطلعت سهلة... ما خسيتش اني باغني ... حسيت اني باقول حاجة... حاجة حاساها باقولها... لو هو مثلا عملي اغنية دسمة كده وبتاع... يجوز طبعا كنت حافشل فيها 100%... كنت حاتعقد.. يمكن ما كنتش استمريت في حياتي الفنية...فهو كبر فايدة عملها لي... انه فهم صوتي.. وبالحان دمها خفيف.. ولون جديد طلعنا بيه......... الله يرحمه....

• هو بالنسبة لافلامك الاولى يعني..تميزتي بانك نجحتي في تمثيل شخصية الفتاة الضغيرة الدلوعة.. نقدر نقول مين من المخرجين اللي كن له فضل اختيار هذا اللون لوضعك فيه او هذا الاطار لوضعك فيه...؟

• اصلهم ما كانوش يقدروا يعملوا لي ادوار غير كده.... انا كنت دلوعة وشقية وعفريتة... مش ممكن... يعني حطلع امثل ... مثل المرأة المجهولة مثلا..... مش ممكن.... طبعا اللي له الفضل الكبير طبعا الاستاذ حلمى رفلة.... الله يرحم... كله الله يرحمه يعني دي حاجة ....... الله يرحمه ... فهمني طبعا وهواول ما شافني اعجب بيا وعمل لي فعلا روايات كلها كانت في وقتها حسب سني وحسب صوتي... فكانت اكترها افلام مرحة.... كان فيه قصاده بقى يعملي افلام دراما شويه كده وبتاع... للي هو الاستاذ ابراهيم عمارة ..... الله يرحمه......... هو اللي كان بيعمل لي الافلام... فكان واحد كده وواحد كده... كنت ماشيه ع الخطين... انما كان الغالب اللي هو دور البنت اللي بتحب... الشقية... تروح تستني حبيبها في الجنينة .. بتغني له... الحاجات دية....

• وهو الحقيقة برضه زي م حضرتك قلتي.. انك تالقتي في الاغاني الخفيفة وقلتي لي الاستاذ محمد فوزي كان له الفضل في توجيهك نحو هذا اللون... بالنسبة برضة لباقي الملحنين.. كان فيه ملحنين اخرين كان لهم فضل في تقديم اللون الغنائي الناجح ده ليكي..؟

• طبعا فيه الاستاذ محمود الشريف.. يعني ابتدا بلحن اللي نجح له جدا... حبينا بعضنا... فكانت خفيفة وعاطفية.. يعني ده كان لون جديد.. يعني محمود الشريف يعمل الغنوة الخفيفة وعاطفية حبينا بعضنا... نجحت نجاح..نجحت الفيلم الغنوة.......... وفيه الاستاذ منير مراد هو بقى لحن لي الاغنية الخفيفة الشقية زي واحد اتنين ومشيت ايامها اوي واحد اتنين.... ومشيت فترة كده.. وبعدين جالي .. لحن لي ان راح منك يا عين......

• الفنانة شادية.. اذا استطعنا ان نقول ان مشوار شادية مع الغناء ينقسم الى 3 مراحل فنقدر نقول ان المرحلة المتوسطة كانت من خلال الحان بليغ حمدي ومحمد الموجي فيها قدمتي اشهر اغنيات الفورم والاغنيات التعبيرية زي قولوا اعين الشمس وغاب القمر... نقدر نقول بايه بيتميز تلحين بليغ حمدي وبايه بيتميز تلحين محمد الموجي..؟؟

• طبعا انا مش حقولك بيتميز.. انا مش خبيرة في .... انا اقولك شعوري ايه والمواقف ايه.... يعني بالنسبة... يعني بليغ له الفضل ان انا كنت بطلت اغني ييجي سنتين تلاته في المسرح وايامها الافلام ما كانتش غنائية... كنت اتجهت للتمثيل بكل كياني يعني.... فجه بليغ حمدي فاجأني بلحن اه ياسمراني اللون .. بعديها قولو لعين الشمس..حقيقي خلاني حاسه ان فيه حاجة كانت واحشاني وانا مش حاساها... يعني كل احساسي كل شعوري للطرب .. للمغنى طلع على طول.. تاني يوم روحت سجلتها في الاذاعة ... يعني كأني حاجة انا كنت مخبياها.. ليه.. ما كنتش لاقيه الحان يعني... الظروف مش لاقيه.. ولاقيه روايات حلوة... انما يعني ظلمت الغنا يعني...ده كويس... وبعدين بليغ .. فترة الحقيقة.. الاغاني بتاعته تسمعيها تحفظيها تخش قلبك على طول.. وكنا فتره كده ما فيش.. كان فيه الحان جديدة.. وبتاع كده.. حصل تجديد من هنا..............
الاستاذ الموجي تسمعي اللحن بتاعه من اول مرة تقولي اه كويس... وبعدين تسمعي تاني مرة تلاقي جملة عجبتك تالت مرة رابع مرة ... اما تسمعيها كذا مرة تكون دخلت دمك.. تقعد بقى معاكي.. اذا كانت تقعد سنين تقعد... ده الاستاذ الموجي.... حتى وانا باحفظ معاه كمان .. كل ما باحفظ تلاقي باحب الغنوة اكتر... كل ما باقعد..وتاخد وقت يعني... كل ما احفظ احبها اكتر....

• وبالنسبة للاستاذ كمال الطويل واللي بدأ معاكي رحلة الغناء ابتدء من الاغنيات لخفيفة ولحد الاغنيات العاطفية الناجحة ... بتذكري يا ترى بداية غنائك لالحان كمال الطويل..؟

• اه الاستاذ كمال... ده انا باعزه جدا... وباحب فيه القلق اللي فيه... قلق الفنان... هو طبعا زيادة عن اللزوم شويه انما كل فنان فيه قلق... فيه اللي بيعرف يداري وفيه اللي مابيقدرش يداري... استاذ كمال من النوع ده.. اللي مابيقدرش يداري... وتحس كأنه لسه بيلحن اول لحن في حياته.. دي حلوة اوي اوي فيه اوي...... فأول لحن كان ( قل ادع الله ان يمسسكم ... ان يمسسك ضر) ده كان في فيلم واول مره اشوفه وجه وحفظت اللحن في يومين وكان لحن جديد عليا.. اول مرة بقول لحن بالريتم كده... وحاجة جديدة لسه كانت عليا وكنت خايفة الحقيقة اوي وعملته .. سجلته للفيلم.... تاني مقابلة جاني البيت.. كان فيلم برضه اسمه ( عجباني وحشته ) ... هو عنوان غريب... بس موقف الفيلم كده... فجاني ولقيته داخل مع الاستاذ عبد الحليم.... كان لسه ما عملش ولا فيلم عبد الحليم بس كنا سمعنا صوته... وقعد... انا متوقعة حيجيلي بالعود مثلا.. او انا عندي عود... حيسمعني... قاللي يا شادية انا صوتي وحش... مع ان صوته حلو كمال... انا ماقدرش.. هو حيحفظك... لقيت عبد الحليم هو اللي حفظني اللحن.. ودي ذكرى حلوة ان انا حفظت لحن عجباني وحشته من عبد الحليم.... فآخر لحن....... وبعدين عمل لي لحن وحياة عينيك وفداها عنيه برضه للفيلم...... ده كان كله بيبقى مواقف افلام... الغنوة اللي انا باعتز بيها وباحبها وحسيتها اوي... اغنية رحلة العمر ابتدت.. لان دي مخصوص لينا... لاحاسيسنا... مش لموقف الفيلم وبتاع..... لأ دي حاجة احنا حاسينها... اذا كان هو ولا انا يعني... قعدن يمكن يومين مع بعض بس... هو على البيانو وانا بالريكوردر... ويعزف شوية.. جملة... يقول آه دي كويسة... اسجلها .. يرجع تاني لا لا لا نعمل حاجة تانيه...... ويروح... فسجلت له كل اللي عمله... لغاية مانقينا الحاجات اللي احنا حاسينها .. الكويسة.. وعملناها على طول الغنوة..........


..............................
وبعد كده ...
بنلاقي وحوار سريع مع الموسيقار كمال الطويل اتكلم فيه عن اول لقاء مع شادية واكد كلامها عن قصة اللحن اللي عمله وما كانتش الكلمات عاجباه بس اصدقاؤه قالوا له ما تضيعش منك فرصة العمل مع شادية حتى لو الكلام مش قد كده مادام مناسب لموقف الفيلم وقال ان عبد الحليم هواللي حفظ شادية اللحن ولما سألته المذيعة عن اكتر ملحن قدر يفهم شادية قالها بلا جدال شادية ومنير مراد ثنائي ناجح جدا واخر سؤال كان اكتر غنوة بيحبها لشادية قالها.........." انا كل اغنيات شادية باحبها..."

واحنا كمان بنحب كل كلمة قالتها شادية وكل لحن غنته.........

مهرجان النجوم
الجزء الثالث..

• الفنانة شادية .. في السينما بيعتبر دورك في المرأة المجهولة وشاطئ الذكريات وليلة من عمري بداية تحول من تمثيل ادوار البنت الشقية لدلوعة للادوار الكبيرة الناضجة لمين بيرجع الفضل في هذا التحول السينمائي بالنسبة لشخصيتك.........

• هو الفضل يرجع للاستاذ صلاح ابو سيف .. ليه .. حاقولك.. كنت الافلام كلها كانت افلام زي ما باقولك .. لدلوعة اللي ما لهاش دعوة بحاجة ... افلام ما بتقولش حاجة يعني اهه....... الواحد ابتدى بقى ايه يعني ينضج ابتدى سينمائيا كمان فنيا.... زهقت م الادوار دي.... باكررنفسي كتير ولازم حاغني كذا غنوة ولازم ولازم........ فجه الفرصة كنت باشتغل فيلم شباب امرأة الدور بطولة لتوتة.... تحية كاريوكا .... حبيبتي هي.... فمثلت الدور... انا كنت الاول اقرا.... مش اقرا السيناريو..... اجتماع نقعد ونقرا السيناريو كلنا... ما اهتميتش ان دوري... دوري اصل ما كانش ينفع دوري غير كده..... يعني صلاح ابو سيف مش حيقدر يعمل اكتر من كده. هو كل الدور بتاع تحية وانا اهو دور بنت اللي هي برضة .... العبيطة اللي بس جية عشان تغني في الفيلم...انا وانا باشتغل مع صلاح ابو سيف استفدت منه حاجات كتيرة اوي اوي يعني..... طريقة شغلة... اخراجه.... الممثل اللي بيمثل معاه ..... حتى وانا بامثل معاه دوري ما بيقولش حاجة بقيت حاسه اننا عايزة عمل حاجة ومشقادرة من الدور...... بعد الفيلم ما شفته قررت اني اغير اللون بتاعي باي طريقة اننا ماقعدش بقى البنت الخفيفة دي... فكرت انتج..... وده التحول اللي حصل .... مش حصل م المرأة المجهولة ..... حصل من ليلة من عمري... اللي هو الطفل للي في العنب دي لغاية دلوقتي الفيلم ده يعني كتير كمان امهات يذكروه....... فجازفت وانتجته...... انا ما عرفش طبعا في الانتاج ولا أي حاجة بس جازفت وانتجت ده وشاطئ الذكريات ... الفيلمين دول فده لفت نظر المخرجين ليا اني انا باعرف امثل والله ...... يعني مش لازم تطلعوني باتنطط كل شوية والحاجات دهيه....... فابتديت في الادوار اللي هي اللص والكلاب اللي ابتديت بيها ما غنيتش فيها وابتدينا نستمر في المرأة المجهولة... فالفضل للاستاذ صلاح ابو سيف...جه بقى ايه انا معجبة جدا بصلاح ابو سيف احب شغله جدا شوفي الواحد... عملت كام فيلم ومش حاقولك بقى لي كام سنه طبعا.......... كان املي اني انا كل سنة سنتين اشتغل مع صلاح فيلم .. ما حصلش للاسف....... جه فترة مثلت فيلم اسمه لوعة الحب ..... معاه... مش كفاية ده يعني.......... مش ده الدور حتى ولا الرواية يعني ما كانتش النجاح اللي انا كنت منتظراه...
• وبعدين جاني فرصة تانية اللي هي القاهرة 30 فللاسف انا كانت ليا ظروف انا كنت فاكرة اني انا حابقى ام مثلا فما فلحتش الحكاية ........ انما ايامها ما كانش طبعا كنت رافضة كل فيلم... فراح مني...... انما للاسف الي الان كل املي عارفة زي الوجه الجديد اللي بيعجب بمخرج وعايز يشتغل معاه ... انا في الوضع ده دلوقتي ... لان اخراجه .... كل فيلم بيعمله صلاح ابو سيف بيحط بصمة ..... فيه يعني بصماته كتيرة اوي ... فيه لما يؤرخوا للسينما المصرية اكيد حيطلع ست سبع اعمال من صلاح ابوسيف لوحده بصماته على السينما المصرية...... فيارب تيجي فرصه كده........... شخصيته في الاستوديو يعني اهم حاجة اللي بيريح الفنان وكل العاملين انك تحس بشخصية المخرج.... يعني المخرج هو مثلا من كل كبيرة وصغيرة يبقى عارفها.. جاي داخل البلاتوه عارف كأن الحكاية دي عاشه قبل كده وبيعيدها..... تحسي كده يعني...... ما فيش حاجة تفلت منه كده........

• الفنانة شادية ........ حضرتك عملتي مع معظم مخرجي السينما المصرية ...... ماذا تعني هذه الاسماء في ذاكرة شادية......؟

** المرحوم حلمي رفلة.............

• ده ابويا الفني وعلمني نظام المواعيد يعني مثلا لغاية النهاردة يقولوا انا وغيري من الفنانات يعني فيه كتير دلوقتي .... يعني فيه كام فنانة .... المحافظة على المواعيد مواعيد العمل .... ده اهم حاجة..... احترام العمل... يعني الكاميرا مثلا حتدور تسعة....... تسعة الا خمسة اكون جوة البلاتوه بمكياجي بلبسي بشعري.....حافظه اللي حاقوله ايه.... عارفة اللي حاعمله ايه..... تسعة الاخمسه اكون في البلاتوه ودي حاجة علمهالي وانا مبسوطة منها... يعني..........

** المخرج كمال الشيخ..............

• المخرج الرشيق بقى.... يغني شغله..... لونه فيه رشاقة ....... فيه حتى..... وبعدين السسبينس اللي بيعمله حتى في الاستوديو طريقته كده برضه..... يفاجئني بشوت حلو.... يفاجئني بلوكاشين حلو..... يفاجئني....... يعني حقيقي كمال الشيخ ده فيه اللون بتاعه هو كده شخصيته زي افلامه....

** المخرج عاطف سالم........

• عاطف سالم اخراجه...... اكتر رواياته روايات نسانية خصوصا من ناحية الاطفال...... يعني هو احلى واحسن مخرج اخرج افلام للاطفال..... ودي مش موجوده عندنا الحقيقة.........

** المرحوم فطين عبد الوهاب.........

• فطين الله يرحمه .......اولا ده كان اعز صديق ليا...... الحقيقة........ علمني اولا خفة الدم في الشغل ازاي الواحد يعني يحب شغله وهو بيحبه مثلا.... الكوميدي ...... اولا الكوميدي الراقي يعني ما فيش الى الان بعد ما فطين يعني.. الله يرحمه.... مافيش افلام طلعت في نوع فطين..... علمني المرح وخفة الدم في الشغل يعني تاخدي الشغل بايه..... كل ما ترتاحي في شغلك واعصابك تبقى هادية وتقوللي كلمة بتاع تعليق وانتي بتشتغلي في السيناريو فيه مجال انكط تعملي مشهد احلى او تضيفي اليه حاجة ده خفة الدم .....هو ده فطين عبد الوهاب.....

** حسين كمال..........

• اتعلمت منه يعني ازاي مثلا هو بيخرج من غير ما يكلمني يقوللي ملحوظة او انا اقوله رأي بنقولها بعنينا عارفة ازاي..... يعني مثلا يعني انا باعمل الشوت..... بروفة لسه.. احنا بنعمل بروفات ليه لان كل بروفة بيطلع فيها حاجة من الممثل يا حاجة كويسة يا حجة وحشة ما يعملهاش ...... مجرد ما باحس باحساس حلو حسيته بابص في عينيه بالاقي عينيه مدمعة ...... شوفي انه حس بيها ..... الاحساس المتبادل بين الفنان والمخرج من غير كلام من غير زعيق ..... يعني توجيهات بصوت ولا أي حاجة..... يعني ده حسين كمال.... واحلى حاجة اما تحسي يعني الفنان وهو بيعمل الحاجة من جواه والمخرج حس بيها ..... والمخرج بنظرته ليا عرفت هو عايز ايه اطلعه....... يعني دي حاجة حلوة اوي في حسين كمال.........

• الفنانة شادية ....... عايزة اسألك بايه بتستفيدي باللي بيكتب في الصحف والمجلات في صفحات النقد الفنية وهل غيرتي من بعض ارائك عشان تستجيبي لرأي احد النقاد او الصحفيين مثلا........؟

• شوفي انا بالنسبة لي ..... الحمد لله كل النقد اللي كان ليا كان نقد موجه ..... الحقيقة يعني لو كان فيه في السنين دي كلها فيه حاجات تبقى كده تزعل ملهاش اساس يعني كانت بسيطة اوي.... انما اكتر النقد اللي وجه ليا كنت باستفيد منه ........ الحقيقة.........
مهرجان النجوم
الجزء الرابع والاخير..

• ......................................

• لما الاقي موهبة ليه ما اشجعهاش...... لاني انا كمان في بداية حياتي ما اقولش اني انا على طول.... روحت على طول لحلمي رفلة ومحمد فوزي اخدوني....... برضة ان شوية مريت بمراحل ..... اتجرحت فيها يمكن .....او اتصدمت فيها... او في ايام حسيت فيها اننا مش حاغني....... يعني مش حاعرف اغني تاني ..... او ما ينفعش اغني او امثل يعني........ انما جه التشجيع لما حلمي شافني وفوزي واخدوني وبتاع........ فقررت بيني وبين نفسي....... وده من قلبي....... ان كل..... ربنا يارب لو نجحت وبقيت مشهورة وبقيت يعني ليا كلمة...... اني انا أي انسان كويس حاحس او انسانة ان فيه حاجة ...... لازم اساعده..... ودي باعملها من قلبي...... باحط نفسي في الموقف ده على طول..... ييجي قدامي اللي انا شفته فعلشان كده....... من قلبي انا احب اشجع الحاجات الجديدة.... واحنا محتاجين ...... يعني مش ممكن الواحد حيقعد على حاجة واحدة...... لا يمكن..... واحنا بنستفيد من الجداد كمان..........

• طب خلاصة تجربتك مع كل منهم... مع خالد الامير وابراهيم رافت وعمار لشريغي... اللي اخدتيه من خلاصة هذه التجربة ؟

• اخدت ان انا جددت برضه....... يعني مثلا خالد الامير اقولك..... اتعودت عليك برضه كان لون جديد... نغمة جديدة... والفنان كل ما يلاقي حاجة جديدة ما هياش متكررة وحلوة...... طبعا بتعيشه.. بتحييه.. بتخليه حاجة جديدة... بيبقى سعيد يعني....

ابراهيم رافت .... لونه حلو جدا.... حنين ومتمكن من المزيكا بتاعته... الحقيقة يعني تحسي انه.... هو دلوقتي خلاص الحمد لله بقى معروف يعني...... اما غنيت له اغنية انا وقلبي حسيت ان الفنان ده متمكن من فنه.. ومن نفسه ........ حقيقي....

عمار الشريعي..... برضه لون جديد خالص..... دم جديد برضه.... يعني كفايه احساسه باغنية اقوى من الزمن....... اما قعدت معاه........ انسان عايز يقول حاجة ..... يعني الفكرة ....عايز يقول ومش عارف......... عايز يطلع حاجة لمصر......لبلده ...... زمش عارف...فعشنا مع بعض في الاغنية دي ومع مصطفى الضمراني.... الحقيقة..... فطلع حاجة كويسه اوي اوي وده من الملحنين الجداد.....دول اللي اعتز بيهم.........

• طب اذا كنا بنتكلم عن الجديد و الشخصيات الحديثة او الملحنين الحديثين اللي حضرتك تعاملتي معاهم... فبرضه اتعاملتي مع مخرجين شباب ويمكنمن انجح افلامك اللي نجحت...... افلامك الحديثة يعني اللي اخرجها المخرج اشرف فهمي... فرأيك ايه في الاسماء الشابة لمخرجي السينما اللي حقولك عليها... اشرف فهمي وسعيد مرزوق ونادر جلال...؟؟

• دول يعني الواحد فخور بيهم...... الحقيقة... وفيه مخرج ..... اسمه.... اظن سمير سيف..... وفيه محمد راضي...... الواحد بيفرح لما بيلاقي عناصر جديدة بتتخلق وبتعمل حاجات كويسه.... دي حاجات بتسعد الانسان يعني...... الحقيقة.....

• في راي شادية بايه بيتميز جيلها من الممثلات زي فاتن حمامة وماجدة عن الاجيال اللي ظهرت بعدكم سعاد حسني وبعدين جيل ميرفت امين ونجلاء فتحي ؟

• طبعا جيلنا بيتميز بالمحافظة على لمواعيد.... ده غير سعاد طبعا انا ما بقولش على سعاد..... انا باقول على جيلنا ....... لسه حاتكلم عن الجيل الجاي......... وحبه لشغله.... وبعدين يعني لو اقولك كلنا دخلنا في سن المراهقة يعني....... السن انتي عارفة البنت او الشخص بيحب يعني برضه يتفسح..... يروح ..اصحاب مثلا....ما كانتش دي في حياتنا.... ما نعرفهاش يعني..... انا ما عشتش سن المراهقة دي خالص..... ما حسيتهاش كان كله في الاستوديوهات..... ومش متضايقين يعني....... مش يتعمل دي حاجة غصب عننا.... لأ دي حياتنا..... كان حياتنا يعني شغلنا.......

• الفنانة شادية .... نرجع مرة تانية لعملك السينمائي ونتكلم عن اشهر العلامات السينمائية الناجحة في مشوارك الفني ؟

• طبعا دي مش انا اللي حاقدر اقولهالك... انتي تسألي الناس طبعا.... طبع باعتز بالمرأة المجهولة ما اقدرش انسى الفيلم ده بالذات يعني.... كمرحلة من مراحل حياتي الفنية.... كنقلة عجيبة يعني... ماقدرش انساه كذكريات كمان ازاي اتعمل الفيلم يعني...ده ما انسهاش ابدا.............

• وبالنسبة لاهم الجوايز اللي حصلتي عليها عن الافلام...؟

• هو اول جايزة اخدتها برضه للمرأة المجهولة وبعديها جوايز ييجي تلات اربع جوايز....

• الفنانة شادية .... حضرتك قدمتي عدد كبيرمن الثنائيات الغنائية الناجحة مع الفنان الراحل عبد الحليم حافظ ... بايه بتفسري نجاح هذه الثنائيات ونجاح الافلام الغنائية اللي قدمتيها مع عبد الحليم ؟

• مش حافسرها بحاجة...... الا انها كانت يعني في الافلام كان لها مواقف حلوة اوي وكان فيه فرصه في الرواية ان احنا نغني الثنائي مع بعض وده للاسف مافيش دلوقتي.... بس كانت بتبقى حلوة اللي ابتداها عبد الوهاب وليلى مراد واظن ورجاء عبده.... يعني كان بيبقى لها طعم تاني ... يعني حاجة حلوة مش كله..... وواحدة واقفة تغني او واحد ..........ده حوار بين اتنين... بيبقى حلو وي..... للاسف مش موجود دلوقتي يعني ...... فاللي نجحها ان كانت بتبقى مواقفها حلوة في الفيلم ليها معني......... مافيش دلوقتي.... مين اللي حيغني مثلا ؟؟ حييجي محمود مرسي مثلا يغني مع نجلاء....... مافيش......مافيش مطربات ومطربين بيتعملهم افلام استعراضية..... وده نقص.... ليه ..... مافيش افلام استعراضية..........

• طب اسال حضرتك برضه الاصوات الجديدة ... يعني اسالك عن رايك فيها في عبارات قصيرة اسالك عن على الحجار مثلا.........؟

• انا على الحجار عجبني اوي في غنوة كان عاملها له بليغ.... صوته فيه رجولة...... شباب ورجولة... الحقيقة يعني ... صوت مصري.......

• عماد عبد الحليم ........؟

• عماد صوته حنين وصغير .... يعني كل اللي باطلبه من عماد ومن اللي حواليه انهم يراعوا صوته شوية لانه لسه صغير...... لو ده ما يجهدش صوته...... ما يجهدش ... ما يرهقش نفسه.... يحافظ شوية على صوته...... يعني يجوز يبقى حاجة كويسة اوي...... انما الارهاق وعدم الاهتمام بصحته ومش كويس وخسارة....... لان صوته حلو.........

• عفاف راضي.........؟

• عفاف راضي انا معجبة بيها خصوصا في الفترة الاخرانية يعني....... اول ما طلعت باغنية بليغ.... كان لون حلو اوي اوي اوي....... وبعدين ابتدت في نفس اللون تكرر نفسها..... ده مش حلو ده... الواحد يكرر ...... هي نبيهة يعني .... انتبهت للحكاية دي وابتدت تغير .... غيرت على احلى.... كان فيه نس يقولوا لا اما تغير اللون اللي بتقوله مش حاتعرف تغني..... بالعكس اثبتت بتغني حلو وجميل وكل مادا بتبقى احسن وانا معجبة بيها جدا جدا........

• هاني شاكر........؟

• هاني شاكر ده خلاص نفد يعني ......... بس برضه انا باقول .... وفي رأ يي وفي حياتي عملت كده ..... الفنان لازم ما يقفش على لون واحد لان لازم يغير....... لان الجمهور بيمل..... لانه لو كل يوم انتي حتاكلي صنف معين مثلا...... او مزيكا بتحبيها تسمعيها كل يوم حتزهقي...... لازم ينوع شوية في الاداء والالحان........

• هو الحقيقة فيه كتير من الناس بيرى النهاردة ان الاغنية المصرية لم تعد متألقة كما كانت في السنوات الماضية..... حضرتك موافقة على الراي ده....... وهل فيه سبب معين لهذه الظاهرة.......؟

• انا موافقة جدا.....يعني وابصم يعني بصوابعي العشرة ....ان بقى لنا فترة ما فيش...... اولا في الكلام.... افكار يعني مافيش فكرة جديدة....... الغنوة لازم... يعني احنا بنتطور......ساعات انا بيجيلي كلام قلته من كام......... مش حقولك من كام سنىة يعني.... بيتقال........ لسه بيتقال ومازال بيتقال..... لأ....... لازم تغيير في الفكرة...... الاغنية دلوقتي بقت موقف....... مش حكاية اقعد احكيها.. وراح وجه....... وكنا زمان وبقينا ....... وعايزين.... وعندي امل حنشوف......... لأ.... مش ده........ موقف بيتحكي في كام حاجة كده صغيرة...... هي دي الغنوة...... فكرة حلوة..... لحن جديد....... نفسي مزيكا جديدة تخش ودني.... مافيش كله تكرار.......... انا مش عايزة اقول زي كل الناس ما بتقول اما تسمعي ( اللازمة ) ما تعرفيش دي بتاعة مين ولا مين...... دي معروفة خلاص....... يعني دي حاجة اتعودنا عليها وبقت....... انما فعلا احنا بقى لنا فترة كبيرة مافيش حاجة جديدة ابدا ابدا طلعت تاكل قلب الواحد او حاجة جديدة نجري وراها ونقول الله مثلا....... مافيش الحاجات دي لغاية دلوقتي.................


• وفي رأي شادية برضه...... ايه انجح خمس اغاني غنيتيهم بصوتك وبعد عودتك للغناء في الحفلات سنة 70 ..........؟

• لأ كتير خمسة .......... يعني ماعرفش ايه انجح اغاني........... قوللي اللي حبيتهم يعني..

• او اللي انتي راضية عنه مثلا........؟

• يا حبيبتي يا مصر...... قولوا لعين الشمس..... كمان ... اخر ليلة.....وعالي..... واتعودت عليك...... اقوى من الزمن..... وبوست القمر....... وحاجات يعني.....دول اللي فاكراهم....

• الفنانة شادية ....... اخيرا وقبل ما اشكرك في نهاية لقاءنا واقولك مرة تانية كل سنة وانتي طيبة..... لو افترضنا جدلا ان دورة الحياة عادت عشان تبدأ من جديد ..... شادية حتختار نفس الطريق اللي قطعته عشان تصل لمكانتها الحالية ولا فيه اختيار جديد بتفرضه عليكي تجارب السنين.....؟

• يعني لو طلبت تاني حابقى بكرر نفسي... يعني ما انا خلاص عشت الحياة دهيت .... وعشتها يعني في افلامي بالطول وبالعرض...... يعني انا عملت 500 شخصية عشت فيها....... يعني انا مش عشت مرة واحدة...... انا عشت يمكن 500 مرة...... كل شخصية بامثلها مجرد ما السيناريو يبقى معايا وباخش الاستوديو ولغاية ما تخلص...... انا بابقى عايشة في الشخصية دي.... ما بقاش شادية او فاطمة...... بابقى الشخصية اللي بامثلها....... فانا عشت ييجي 500 مرة...... انما لو جيت تاني يعني حاختار...... انا كنت زمان احب اوي اني اطلع محامية....... اختار اننا ابقى محامية باشتغل.... وزوجة وام لست اطفال...........

• السيدة فاطمة شاكر او الفنانة شادية باشكرك في نهاية لقاءنا وباقولك كل سنة وانتي طيبة وباتمنى لك دايما التوفيق والصحة ودايما ناجحة في كل اعمالك......

• وانا برضه فرصة اني اقول كل سنة وكلكوا طيبين .... وكل شعب مصر مرتاح.... يارب..... وفي سعادة...... وسنة حلوة ..... وكلنا نبقى سعدا............

الحلقة موجودة فيديو

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوار شيق جدا و الفنانة الغالية شادية تحدثت بمنتهى الصراحة مما اعطى للحوار نكهة خاصة
تسلم ايدك يا اخت هدى على جهودك

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

شكرا لك ياغالية والموضوع هذا سبق ان نزلته بالمنتدى فيديو بمنتدى الناقد والكاتب الصحفي الاستاذ محمد سعيد

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوار جميل ولا يخلوا من الطرافة والجدية وهكذا هي شاديةمثلما تشدنا اعمالها الفنية تشدنا حوارتها الشيقة وهذه ايضا موهبة حباها الله بها وهي حسن الحوار واختيار العبرات وامتي تكون فيه جدية وامتي تبرق بشئ من طرافة وليس كل شخص يعرف يحاور ويجاوب
علي اسئلة الاعلامي بكل تواضع واحترام وهناك كمان دور الاعلامي الذي يعرف كيف يسال ويترك
المساحة للظيف كي يرد بكل حرية دون مقاطعة ومن افظل الاعلاميين من وجهة نظري امال العمدة نجوي الطوبي وهند لطفي

تسلم ايديكي لهذا الحوار الذي سبق لنا وان تمتعنا به مسموعا والان مكتوبا شكرا لكي ياغالية ونحن
دائما في اشتياق لكل ما يخص حبيبتنا شادية

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوار رائع وصريح مع غاليتنا شاديا.
شكرا لك يا هدى.
لتزويدنا بكل جديد عن عرابة المنتدى الغالية شاديا.

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوار جميل جدا وشادية كعادتها امتازت بخفة دمها واجاباتها المحببة

تسلم ايدك يا اخت هدى

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

وحشتوني ووحشتنا اخبار والله ما تتصوري كام المي لبعدي عنكم

شكرا للحوار الممتع وهذه هي شاديتنا المميزة بخفة دمها ودلعها وتلقائيتها تسلم ايدك

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوارا رائعا وكيف لا ومعد البرنامج ناقد رائع ايضا ويعرف اختيار المواضيع والاسئلة بكل ما يخص شكرا له ولكم

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوار جميل ورائع وياريت نسمعه يا اخت هدى ؟؟؟

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى

حوار رائع وشيق ومعد البرنامج اروع من رائع لان عرف كيف يبرز واهم اعمالها وترايخها والاهم من هذا استضافتها وسماع صوتها مهم جدا لنا وقد علمت ان الحلقات موجودة عندى وياريت نسمعها لان قراءتي للحوار عشت مع وتخيلت ظرفها ولعها ومحاورتها لنجوى الطوبي كانت شيقة جدا

نرجو سماع الحلقات وشكرا للناقد الكبير وشكرا لكم ادارة واعضاء لمنتدى قيثارة الغناء العربي

الموضوع الأصلى : حوار مع شادية برنامج مهرجان النجوم(ردود وتعليقات)  المصدر : قيثارة الغناء العربى