صهد الشتا



الطبعه الأولى عام 1964
الطبعه الثانيه عام 1995





مدينة من غير قمر



الحمل ياما يا مدينتي يهز شاعر كان في ندره يكون غطا

ويغطي قلبك في الشتا

وإحنا سنينّا كلها دايمًا خريف

ما عاش في راسك يا مدينتي غير عرايا الفكر

يتنفسوا بكا ..

يتنزهوا فوق جبهتك في العصر ..

ويشرنقوا اسم الكلام في كتاب ضرير

ويبسموا الأحزان في قلب الفجر



مش راح أقول كان القمر أخضر وعاشق

كانت مدينتي غطته بدموع حداد

لمّا مدينتي رشّته بالصهد و الأحزان

.. كات سمّته

نزل القمر يسأل مدينتي: ليه يا حلوه تصلبيني ليه

وماتت دهشته!

أيامها غاب القمر بالعام ما بانت ضحكته

ولقوه في وش الصبح متطوّح على الجدران



لكن في ليله مش بعيده ع اللي عاش

يرسم حكايته ع الورق

وبألف كلمه لأ بلاش ..؟!

ينزف في سره حسرته

ليله القمر غنى الحياه

ميّل على أبواب مدينتي يبارك الأحلام

لكن في قلب الفجر طاطت الأعلام

كانت مدينتي في الطريق

متنعكشه الأفكار

ماعاش في راسها غير عرايا الفكر

من حزنها

حدفت هدومها السودا في عيون القمر

ولسه قاعده من يوميها في الطريق

مستنظره عتابه القديم

"ليه .. ليه يا حلوه تصلبيني ..؟!"

كان القمر مات

ولقوه في وش الصبح دمعه في العيون



أدبح وتر في ضلوع مدينتي لاجل تركع للقمر

و تغني ليه لحن الوداع

نزلت مدينتي في الطريق جنيّه ليها ع الرموش مليون شراع

بتوزّع الشربات.

مات القمر

ولا مسّته

ولا غطّته ..

غير بس ريح الصبح طير المساحيق

مات القمر

ما عادش ينده المعاشيق

ما عادش ينزل ع المصاطب زي فارس الحواديت



أدبح نغم في عيون مدينتي بعدها أدبح حروفي بسن صفحه من الورق

وأخرج أدوّر عن حبيبتي يا حبيبتي مركبي دايمًا

ورق

يعطش في عز الصيف

يغرق في أول شبر م الكلمات

.. وغرقت في بحر العيون

تركت حبيبتي حرفها الصامت طيور

تنقر في سدري م الصباح حتى المسا

لو كان في سدرك يا مدينتي لسه بيعيش القمر

لو كان ما كانش الحرف يعرف أي سكه للأسى

مات القمر ..

في النهر بيشدوا المراكبيه

.. بيشدوا أمواج الحداد

ع الأرض سالت دمعة العشاق

ولا عاش في قلبك يا مدينتي سندباد

نظرة عيونك لو حتضحك .. ينقتل

زي القمر

فاكره القمر ..؟!

.. أهو ..؟

مصلوب في قلب الهوّ

مرمي على خد السحاب تبكي عليه كل النجوم

تنبح كلاب الليل تشده من ضفايره ينكمش في النعش.

لكن يعود صاحبي القمر!! ما يعودش ..؟!

لكن يقول صاحبي القمر .. ما يقولش ..؟!

ولقوه في عز الصبح دمعه في العيون



و لقيته ..

تتصوّروا ..؟!

أنا اللي ياما .. انحنيت للنعش

ونا كنت عارف إن فيه صاحبي القمر

من بعد ما بعدت خُطايا ..

وبعدت عن قلب المدينه

شفت القمر وش ..

من غير حساب الحزن غطاني ف ليالي الخوف

.. أرتعش ..؟!

يحدف هدومه في رقة النسمات

كانت حبيبتي بعد خطوه من المدينه بتنتظر

تبدر حروفها السمرا فوق أرض البلد

عادت حبيبتي في السما ..

طلعت قمر

خايف مدينتي تقتله

دا الحمل ياما يا مدينتي يهز شاعر كان ندره يكون غطا

و يغطي قلبك في الشتا

بس اتركيلي فوق جبينك .. اتركي ليا القمر

يشرب معايا الصمت وإحنا فوق بحار الحزن







الممثّل



1



راجع وزهره فوق بطن إيدي بتتخنق

ورماد سنين الصمت كحّل رمش عيني بالكلام

مركب ورق ..

خدني معاه .. طفت ف قلق

وشربت آخر الليل عرق

ورجعت كلمه ف وش دنيا من نحاس

صدّت عليا بسمتي

برضك أنا ..؟!

لكن خسرت الريح وصاحبي القمر

وخسرت حتى حسرتي





2



كل المعاني .. كلها ..

أحزان زماني اللي ف ضفايره خيط رماد

كل المعاني هيا هيا .. وسندباد،

كحل رموشه بالطواف

جاب المعاني رياح بتدبح في الشتا

تخرم ضلوع البرتقان

جاب المعاني رياح بتنزف م الجبين

تجرح شفايف فارشه كلمه من الحنان

ريتك ما جبت المعنى تاني للحزين

راجع بجرجر غنوتي ..

زي القتيله ف بحر صهد وبحر برد وبحر جوع

والقسمه إني بغنوتي ..

ضفرت دنيا بالشموع

وف سدرها ..

قالوا عليا ف يوم شبكت في ضلها ..

ورد الربيع ..

كدبوا كل الناس .. أهيا دنيتي ..!

اتفرجوا ..؟!

مسرح إزاز

أبطال خشب

حتى القمر هزّاز

زي الظلال فوق اللعب

زاحوا الستار ..

والفصل كان أول ما كان ..

طائر مزوّق بالجراح





3



مال الممثل .. واترمى ..

كل الايدين راحت تسقّف ..

إيه يهمها ..؟!

غير بس واحده كان في عينها ..

خيط سنابل م الدموع





4



مال الممثل جنب غنوه في ضلها ..

ريحة المطر ..

لكن مشاعره كلها ..

كانت حقيقه ف بحر كدبه .. واترمى

مال الممثل ع المعاني يجسها

أما نهاية طائري

كانت حكايه بتتحكي

لنجمه تايهه في السما





5



.. رجع الممثل قلبه يفرح .. زي يحزن

شاف الحقيقه ف بحر أعمى

شافها بتفرد ضفرها ..

وتعيد ضفاير حزنها فوق ابنها



راجع .. وقلبي في بطن إيدي وصهد يرميه القمر

باتمنى أكون من أي طينه غير أنا

.. لو كنت زهرة صبر

ترضع رماد من غير غُنا

إيه بعد إيه ح اتمنى إيه ..!!

اتحنى قلبي بالقمر

طلع القمر كداب

كحلت عيني بالتراب

ورجعت تاني رجعت أنفض كلمتي،

.. في وش دنيا م النحاس



زاحوا الستار ..

كان الممثل زي المثل مره يكدب .. مره يصدق.

ما يهمكوش ..!!

عادوا الستار ..

أما اللي باقي م الحقيقه مش كتير.

غير إن طعم الحرف طار.

ورجعت زهره ف بطن دنيا م النحاس

تطرق بيبان الخوف وتنده ع النهار

ما يهمكوش ..!

برضك أنا ..

لكن حا دافع عن جريمتي بالسكات



ما يهمكوش ..!!

إن كان في قلب الدنيا معزى .. إدفنوه

قلب الممثل مش رخام

أنا شفت ليله ف حضن قلبه ألف مدنه من النحاس

وف يوم حايدن من فوقيها

لكن كلامه عن جريمته كلها ..

.. راح تحفضوه







...السندباد



في قلب شارع حزني طاطت مشنقه ..

وف صوتي نبي ..

فط العويل وسط الحناجر قلب حاير

كان في إيده شرنقه

كان العويل هوه النبي

خالع عبايته تحت ضل المشنقه

حتى النبي ..

رايحين بكلمه تشنقوه

دا لأنه بل الحرف مره من شفايف فجر شعره

مشماوي

طلعت غناوي

تطرح في عز الصهد عيّل .. تعرفوه

واهو الليلا دي .. وكل ليله بتشفوه

في قلب شارع حزني غنت مشنقه ..؟!

تتصوّروا ..؟!

متزوّقه ..

بعيال كتير

والحزن إن بيوت بلدنا زغردت

والفرح إن عيون بلدنا كات بتحضن أي طير

.. وازاي أميّز طير فرح هزهز جناحه في بحر خوف

بتزغردوا ..؟!

ردت صبيه وتوب كلامها ورده خضرا اتنهدت

بتزغردوا ..! واتشندلت فيها العطور

ماتت في صوتها ألف طيره م الطيور

روحي يا روحي زغردي والضحكه تبقى من الزهور

في قلب شارع حزني شفت الشرنقه

وف كل رعشه من خيوطها ميت نغم

ردت صبيه .. ع اللي بيا من الألم

شاورت على كتوف النبي



كان الكلام واقف عليها .. كان علم

ولو إن كان نور البيوت فستان حداد

كانت عيون الناس حداد

كانت شفايف صاحبتي .. زرقا .. حداد

في قلب شارع حزني عاد لي السندباد

.. عاد السندباد







أغنية الفارس



إن كان للنجم بلاد

إن كان له كمنجه بيعزف فوقها الأولاد

أو كان في زمانه مغنى بيقطف من قلب الدنيا الأحزان

أنا بلدي أبعد من أي مكان

ولا ليا كمنجه بيعزف فوقها نسيم

ولا عشت زماني مغنى

غير يعني وبس ف مره ..

طقت بين ضلعي الآه ..

قام قالوا عليا مغني ..

بلدي أبعد من أي سحاب

وحصاني الأبنوسي بيرقص تحت القمر الأزرق

وبيرفع عينه لأعلى مملكة الكلمه

يرجع في عيونه مطر ..

يسقي صبارة الغربه

أنا عارف شكل طريقي لبلدي

لكن مش ح أوصل ..؟

قبل الفجر ما يشنق نفسه و يتأمل ..

يتأمل عجزه ..

ولحد ما يحرق عجزه شعاع الشمس

أنا بلدي غنوتها الهمس ..

تلمس أوتار الحب وترجع تاني تكش

ونا عشت زماني مغنى ..

ولا كنت مغني لزمن الغش



إن كان للنجم بلاد

أنا ع الأرض كلام ..

متبحتر .. تايه .. متغرب .. وملهوشي بلاد

أنا فارس ولجامي قمر

مخنوق بينادي الريح

تفتح له الباب







رسائل حزينة



1



إيه اللي أقوله ف دنيا ما بتعرفش تشرب غير دموع ؟؟



الريح سكت .. وف سكتته بكيت عنيا ..

أنا كنت عارف إني شايل بين إيديا روح كمنجه

من الخشب

بتروح تسوح وتجيب معاها روح مدينتي ..

.. اللي لابسه توب حزايني في الربيع

إيه اللي أقوله ف دنيا ما بتعرفشي غير شرب الدموع؟؟

أنا قلت أروح أشرب دفا عنيكي

أنا قلت أروح .. روحي الحزينه فرهضت وسط الطريق

كانت إيديكي ألف نجمه بترتعش ..

كانت بعيده ع الغريق

داخل بعزي

ويا الناس في روحي ..

روحي ياما صابها ألف صاحب بالخرس

داخل بعزي شفت روحي بتنبعث

لما عيونك بوّشت صلبان عذابي شفت دمعي بيرتعش

يرسم كلام معرفشي إيه معناه لكن أقدر ..

.. أقدر أقول الآه ولا غشش حياة غيري ..؟





2



إن كان قلبي الحزين حزن القمر فوق المدينه

يحدف شعاعه ألف مركب ع البيوت

ويعزي ويا الناس في روحي ..

رايح أقابلك في الطريق لابسه شعاع الشمس

إيه اللي أقوله ..؟؟

حاضنك .. وحنسى إني ميت من سنين ..





3



دنيا خساره ..؟؟

قالها الهلال لما لمحني في الطريق محني ..

دنيا خساره ..؟؟

قالها القمر فوق بسمته الشايبه ..

ونا كنت وحدي في الطريق بانزع ثياب الحزن

باغسل عيوني ف بحر ضحكه من عيونك

يا نجمتي المغسوله بالأحلام

ويا ابتسامه في دنيا من غير ابتسام





4



نقرت طيور الابتسامه فوق حيطان قلبي الإزاز ..؟؟

أنا قلت مين يطرق بيبان مارد حزين ..؟؟

الريح سكت .. روح النسيم عادت



عدى الحمام هزاز ..

وشفت ضله ف نهر قلبي فوق حيطان قلبي الإزاز ..

أنا قلت مين يقدر يطير و يجيب كلامه م الحرير؟

مين .. مين بيطرق فوق جفون قلبي الضرير؟

دا الريح شرب من سدري مزيكتي

وفضلت أحلم بالحمام يرجع يطير ..

.. يرجع عشان يمسح لي تنهيدتي

الليل وحيدي و عايش .. جوه أحلام الغمام

لو طال خيالي خوخ خدودك مش حيطول غير الابتسام

لو كان خيالي قلب ريح .. قلعه السحاب

ما تصدقيش

ماقدرش أعدي من بيبان

مكتوب عليها بالرموش السهرانين:

إن القمر مخنوق في ليلة حب ..

إن الأمل مشنوق على ضفاف العيون

إن النجوم سكنت قرار الجب ..





5



مجنون وراكب فوق حصان الحزن

ولجامي كلمة حب فوق الريح بلا حكمه

عديت بحار الحزن ياما كلها تشبه بحار القلب

قطفت ايديا من النجوم نجمه

و ف سري قلت أديها لصحابي

وفي المدينة كان طريقي لصحبتي خالي

وقف الفرس

ونا كنت شايل فوق ذنوب الدنيا دنيا فوق عنيا

وقف الفرس من تحت تعريشة عنب عطشان

بيشرب من عنيا

.. آه يا حبيبتي .. النجمه كانت بين ايديا.

ما لقيتش غير إيديك

أول ما جيت أزرع عليها نجمتي

ماقدرش أقول آخر حكايتي ..

آخر حكايتي مُحزنه ..





6



شاب النسيم ..

شيبة نسيمي ف سن ريشتي في القلم

مات النسيم ع الغصن

من بعد ما اتحنى ..

راح يستحمى في الألم



جمعوا النجوم كل العرايس .. لبسوها توب نحاس ..

توب النحاس م الحزن مش أحمر ..

ولا كان في قلب المعزى واحد ليه مزاج للحزن

القهر كان في الحلق .. كان أنفاس ..

.. متجرحه في الصهد .. وادي الناس ..

يا حسرتي عميوا ..

كئن قلبي المحزنه،

زغرد في أركانها الحزينه طير فرح تايه وتاه منه الغنا

يا طائري ..

لو كنت تقطف من عيوني نظرتي ..

لو كنت تنزع ضحكتي ..

وتشيلها و تزغرد بعيد

وإن كنت يوم حاتشوف ربيع.

نازله على كتافه العطور زي الضفاير

وتلاقي قلب الورود متفتح شفايف

تبقى حبيبتي اتنسمت منها مدينتي بالحياه

بعتر عليها ضحكتي

وف قلبها زغرد .. وخدها من هنا

وابعد بعيد لاحسن مدينتي ف سدرها

أقفاص كناريه مسلسله

لاحسن مدينتي السنبله

واللي ف رموشها خط راسماه العطور

ما تساعش ضحكه من شفايف غنوتي

ضحكت حبيبتي والسما طاطت زهور

خدها يا طير .. وابعد بعيد

دنا جوه قلبي مَحزنه





7



إزاي أزغرد ..؟؟

إزاي أخلي جوه قلبي أي حاجه من الربيع ..؟؟

فضيت كاساتي .. واتملت بالريح

والحلم جوه المحزنه ممدد ..

إزاي أزغرد ..؟؟

ونا عشت فوق رمشك نسيم أخرس

كل الطيور من حزنها ف سدري بتبحلق

وفي حلمها الشمس تنفش شعرها ..

إزاي أغني وضهري محني ..؟

دنا قلت لما ف يوم أشيل اسمك على كتافي

أقدر أطير والدنيا ما تساعني

الدنيا صارت سجن مطوافي

أما مدينتي والأغاني واللي عايش واللي مات ..

ماقدرش أميّز ضحكه خضرا في السكات

ونا ضهري محني ..



شاب النسيم ..

أما المطر ..

بيرخ يشرب م التراب

ويفوت عليا يقول ما عادش الواد حيقدر ع الأغاني

صاحبي لمحني .. سألني، جاوبته

إزاي أغني وضهري محني ..

إزاي أزغرد ..؟؟

وف عيوني لكل شيء ..

نظرة عتاب





8



نخ الفرس ..

ونزلت أدفن كلمتي ..

فارس سلاحي ضحكه دبلانه ع الخدود

كانت ملابسي من التراب من بعد ما ينداس

من بعد ما طاف جوه قلبك يا حبيبتي ..

جوه قلبك برضه ناس

كدب .. وخرس ..؟؟

نخ الفرس ..

بانفض ضلوعي .. فوق ضلوعي ناح وتر

عضيت مدينتي في بزها ..





9



قام الفرس تاني ..

والشمس قرص شعاع بيتفرفط

جاني الكلام تاني

جاني بيحبي تحت قرص الشمس

قال الرياح حتقوم في رحله فوق محيط الخوف

يتنفسوا كل اللي كدبوا تحت ظل المحزنه

أما اللي عاشوا تحت قرص الشمس كلمه بميت حنك

يتصوّروا شكل الورق

أخضر و رسمة حب فوقه بتتولد ..

راح يركبوا مركب عرق ..

والصبح يكبر فوق عيونهم مدنه خضرا من الكلام



قام الفرس تاني

الدنيا قامت فوق جناحه .. والحرس

طاطاوا البنادق لاجل يبقى الضل غيمه مزهره





10



يا صاحبتي ..

مثلت دور الريح ..

ولبست كل قناع

لفيت مدينتي والحواري وفوق دماغ الحزن نزلت كلمتي

ورجعت ضحكه ف سدرها ..

مليون شراع



.. وعطشت ساعة الفجر

نزلت عيوني فوق ضفاف صاحبي الكلام

واصطدت كلمة نصر ..

فين .. فين أخبيها

نفسي أداريها

وصلوا الحرس ..

رشوا التراب ع الفجر

ورجعت وقت الصهد ما بيغرز ضوافره في الدماغ

محني بالضياع

كل العيون شاورت عليا

أما الرموش: كانت خناجر لاتهام ..

العين دي قالت: مستحيل

وعيون صحابي شفتها

موال بيحدف ع المدينه غنوته

واتنهدت كلمة فرح ..

فط الكلام ع الجرح يمسح له

بالبوسه يضحك له

حط الندى من فوق بزاز الصبح ينده له:

الجرح راح

الجرح راح



يا صاحبتي ..

وف مره وقعت صرختي

وقعت على كتفي الجريح

وف مره ماتت دهشتي

على رنة التسابيح.

وف مره زامت ع الربابه كلمتين فيهم بنوح

زفوا الحواري بغربتي

لكن جناحي ما انكسرش

وعدت تاني شعاع بروده ع الصليب

حامل صليبي ف ضل رعشه فوق بزاز المستحيل

لفيت مدينتي كلها

علقت قلبي ف سدرها

شاوروا عليا

دا مستحيل الكدبه تكبر فوق عنيا

-جرحت سدري لاجل ياكلوه العيال ..-

والريح بينقر بطن إيدي وبين إيديا

..حزمة ورق عرقان

من بعد ما فط الكلام من كهوف الصهد

شاوروا عليا ..

علقت كلمه من كلامك جنب فرعة ورد

ومشيت أغني لدهشتي:

يا دهشتي

.. زي الإزاز اتكسرت

مارجعش معنى الخوف ف ضله مشنقه.

ورجعت ريح

طعم المطر فيا ..

يغسلني .. يغسل سكتي

ويهش ريحة كدبتي

يا صاحبتي

كل اللي قلته ف كدبتي

إني كرهتك رايه خضره ف سكتي





11



كان النسيم مقتول على جدران شوارع ضحكتي

كان النسيم ابن النبي مشنوق بيبكي ع الحيطان

يبكي ويهبش حسرتي

كان الرصاص خارم ضلوعه تحت قرص الشمس

وف وسط غيمه شفت ضلي جنب ضلك

وشفت طعم الموت شفايف م الكلام

إيه .. إيه جرى؟؟

قالوا النبي مشنوق وضله .. جنب ضلك

يا هلترى ضلك كمنجه ولاّ ضلي المشنقه؟؟

ولاّ ده ضل حسره في العيون

ولاّ ده ضل جدراني الحزينه

ضلي اللي مايل ع المدينه

ضل الكلام .. لمّا تولده ..

في السر فرحتنا الحزينه ..





12



قام الفرس ..

قام يلتفت ع الشمس .. فين الشمس

يا مين يجيب جرس ..

يجرح جبين الهمس

ويصحي قلب الفارس المهزوم

قام يلتفت ع الشمس .. فين الشمس ..

يا مين يجيب للصمت حبل ويشنقه

ويصحي قلب الفارس المحزون .. ويحلب شرنقه

يحلبها لما النجمه يرقص ضلها

في بزاز بلدنا الطيّبه

يا مين يجيب للصمت باب، ما يكونش قلعه مدهبه

قام الفرس يلحس جبين النسمه عادت ترعبه

قام يلتفت ع الشمس .. فين الشمس .. فيه ولد

ولوحده واقف يجلده

صهد الخرس

وبترعبه .. كلمة .. حرس

يصحى ويهرب بالفرس ويعود في نجمه بتولده

ويعود بيغزل م البنفسج ألف مدنه من نحاس

يضرب حيطانها تضحكوا

ولا تعرفوا

إن المدينه كلها رقصت حداد

إن المشانق كلها عيونكو وضلها ..

مخدع دهب

لكنما فارسكم المحزون بيحلم بالورق مركب كلام

ولا تقدروش .. في موسم الأحزان ..

لا تطعموا قلبه البنفسج ولا ..

راح تولدوا فيه بالغزل إنسان

وإن كنت حارجع يوم مصدي في الربيع

دا لأن ساعة العصر واحد م الحرس

طخ الفرس قدام عيونكو كلكو ..

ما قدرتوا حتى تكسروا وسط الحناجر رعبكو ..

ولسه برضه بتضحكوا



قام الفرس

قام يلتفت ع الشمس كات الشمس راميه صهدها

في سدركو ..

يا قلبكو ..؟!

ولسه برضه بتضحكوا

جاءوا الحرس

وشكلهم: اسود غطيس

مثل الغراب .. ومثل ليل الغريب الحزين، الوحيد

وضلهم:

مثل نبت الشر اللي طالع حر ..

وف عيونه القهر للشايب والوليد

ومثل كل الكاذبين

والمحتالين

واللي اشتروا كراسة المزاد للدخول

لدنيا المناضلين.







... الغريب



وقت الشفق ما يميّل في تنهيدة ولد بيموت

ويميّل بسدره ع البيوت

أرضع بقلبي لوعته ..

وأفضل أصلي للمدينه

وفي صلاتي

شفت توب مليان ذنوب

محدوف عليا ..

وحدي أنا .. وحدي الغريب



وقت الشفق ما يعيش

في تنهيدة أمل محروقه

وبين شفايفه

زهره بتنجلد ..

وهيا في الأسى مخنوقه

وبين خيوطه الحمره بسمه بتحاول

أفضل أحاول

أفضل أصلي للمدينه



آه يا مدينتي

الريح حيفقس في النغم تاني

حزنك وأحزاني

وإحنا عرايا

رايحين نشوف فوق المرايه رعبنا

خوفنا كلنا .. من كلنا

وحلمنا

اللي تايه وسط توهة اسمنا

إن كان حقيقي لسه لينا حلمنا

ح أفرد شراعي في الغروب

وأشد ترحالي للهروب

ومعايا حلمي اللي اتخنق



من قبل ما تدمع عيون المستحيل فيا

قال الشفق ليا ..

إن البلد ما تساعش واد بيحب بنت

قلت الرياح بتدوّر على الأبواب وتتنفس

قال الشفق: اسكت

الحكمه ما بتنقال في آهة حزن ..



من قبل ما تفرهض في قلبي ضحكتي

نخيت بعمري ع الطريق الملتوي لوية زمن

نخيت أصلي للغريب في همس

كانت صلاتي نجمتين دبلوا في ليلة عرس



من بعد ما مات الشفق .. مات الكلام والصمت

ورطوبة الأحزان بتتنفس على جدران حنك ميت

لما حاولت أقول للفرح أهلاً

كان الكلام في عطوره دايب في رعشة حزن



من بعد ما ماتت على الأسفلت أحلامي

أنا شفت جسم الصبح متعذب

أنا شفت وش الحلم متخشب

يا هلترى ح تقول حيطان عمري "نعم"

القش زي الصلب؟

والكره زي الحب؟

روحي يا روحي اتعلمي م الناس

حاولي تزرعي نبتة أمل رغم الألم بالكدب

لاجل الغريب .. يلقى الحنان والحب







..ولا حاجه يا قمري!



- مين راح يحلب مواله ..؟!

مالت نجمه بتسألني ورجعت تهمس عقباله

عقبالي يا نجمه ازاي ..

أنا مره وبس ف عز الرعب شرقت ف حلق الناي

إزاي راح أحلب موالي وكلمة عقبالي ازاي ..

ازاي ..؟!

والليل جدران مدهونه بلون الويل ..

"ويا عيني يا ليلي يا ليل"

بتميل ع الزرع قتيله بتحضن كتف قتيل؟!



- مين راح يحلب مواله ..؟!

طاطا القمر الأخضر واتنهد ..

واتمدت فرحة بنت ف رجليها اتمدت

خلاخيل النور

طاطا القمر الأخضر واتنهد .. تحت السور

على ضفة قلبي .. وسألني: إيه مالك ..؟!

- ولا حاجه يا قمري ونهري ف قلبي دبلت شطآنه ..

ومالك ..؟

كترت أحزانك وعيالك نجمه ونجم بيهمس عقباله

عقباله ح يحلب مواله ..؟!

ردت كل ضفيره ف راس الريح ..

تتمطوح وتطيح وتسوح تناويح

فطت كلمه ف سدر جريح:

ولا واحد ح يقول لك: خد

ولا وش بيضحك يفسح لك مطرح ع الخد

ولا إيد حتناولك قطفة ورد







...عروستي



الشمس انشقت في ضفيره يمين

وضفيره شمال

نازلين شلال

بيبوس الكتف

واتشعبطت بسرعه ف أول سكه

واتصورت الليل صاحب .. حانات الرقه

أشرب .. وأشرب .. وألف

فين هيا عروستي

هفت .. رفت ف هدومها التفتاه

الفرحة قالت: آه

مشيت ترقص وعيون خلخالها

بتبوس الأرض



مين هيه اللي عيونها الود؟!

دي عروستي اللي دراعها أجمل من عود الورد

ودراعها من غير الشوك

لكن مليان تعابير وحنان للشوق

مزيكه بتتنفس .. تهمس .. همس

مش عارف مين هيه اللي بتعزف باللمس

فوق ضلعي اللي ف لون الحس



و ف ليله .. الليل اتهدل موال

سكران من ريحة فساتين المشمش والحنه

بصيت له سنه

أتاريه كان نور قبل ما أعدّ سنه

ونا لا عرفت أغني ولا أحس هنا

ما قدرتش أزغرد

وأتاريها عروستي اللي بتضحك

كات نجمه وراكبه حصان أبنوس

وشعورها المغسوله بريحة المشمش

بتبوس خطواتي التايهه بتتمزق

هيه عروستي اللي هدومها التفتاه الأزرق

ومخدتها قشر الرمان

ورموشها بحر حنان

دي عروستي ويبقى أبوها الليل

عارفينه؟!

الليل اللي بيبعت نسوانه تقول:

هاتوا المهر

دخان وسجاير وإرايه وصبر

والصبح .. ح نقيم الفرح



يا صحابي الليل كداب

وعيونه أبواب .. أبواب .. أبواب

ورموشه تراب

وبناته ديابا

آه يابا

دا مدينتي حكايه بترباس

لفيت شوارعها ورجعت لبيتنا

من غير .. راس







الصليب



طوبي

لكم

بازرع لكم لحن الخلاص

والفخ في ضلوعي .. نغم

والجرح في ضلوعي .. قلم

مصلوب وحاضن قلبكم

مغلوب مداري جرحكم

مقهور وياما كلكم

بعتوا الربيع .. جبتوا الندم

سيبتوا الدموع .. تحبس نغم

إن كنت يادي الشخص "عم"؟

إن كنت تاجر في الكلام بتبيع

مين يشتري قهر الندم ..؟!

شمر ذراعك يا ربيع

واحصد خريف الكدب

"ما حد .. ح يبيع الإيمان بالشك"



طوبي .. لكم ..

بكره الولد .. بكره الولد ح يشب

ياما انهبش .. هذا الولد ح يحب

بيحبكم ساعة الألم

طوبي .. لكم وقت الندم

هشوا الغبار .. الريح عدم

سيبوا الولد ح يشب

يغزل نهار الحب

يرقص كما ح يحب



طوبي .. لكم

مش كلكم!!

باغفر لزارع حرف بيشقشق على وش الورق

باغفر لفارس فط من صهد العذاب

باغفر لحامي الشط من موج الغرق

باغفر لقلبك يا بلد ..

باغفر لناسك كلهم

فيهم شبابك شاب .. وعمره بينجلد

طوبي .. لكم .. يا سعدكم ..

إنتم زهور الروح جروح .. وبنتولد



من فوق صليب الحرف

باحضن بلدكم حضن

باغسل عيونها بشمس طاله من عيون الجن

بافرد إديها بلمس عاشق من زمان بيحن

وردة شبابي هيا ابتسام العرس

من شعرها نقت صوابعي كل شيب

من خدها .. خد الحبيب

في سدرها .. بارمي الحليب

لو تعطشوا .. قلبي يجيب

لو تندهوا .. قلبي مجيب

لو تتعبوا .. قلبي طبيب

لو تبعدوني .. مستحيل

لو تقطعوا جدر النخيل ما يميل

لو ترجموني بالحجاره ..

لو تقتلوني ف قلب حاره ..

جوه المحاره .. حاتولد

لو تصلبوني ع الرباب

حافضل أغني للي مش قادر يغني خلف باب

و ف قلب شارع حتلاقوني .. منتظر

أسأل عليكم .. وانقهر ..

و ف قلبكم

رايحين تشوفوا اللي انحفر:

"كلمة ندم"

ليه تصلبوا لحن القمر؟!



دي لوقت ح يطل المسيح ..

لو قال لكم: طوبي لكم .. ح تصدقوه!!

دا الجرح ف ضلوعه .. عميق

والفجر فوق السدر شامة نحيب

عارف ملامح وشكم

شايف كلامكم مش غريب

عارفه تمام ..

إنتوا اللي بعتوا للغريب

قنديل ضلام

بعتم إلهكم ع الصليب

بعتوا الغني

بعتوا الفقير

بعتوا الملك .. والمملكه

بعتوا الصديقه والصديق

وبعتوا حتى تراب المعركه

من غير دخولكو في معركه







صهد الشتا



باشرب عمري لفحة شرد

باتمدد على كتف العود الدبلان ..

أحزان .. أحزان .. في خريف الأرض

أنا عايش على ضهر خريف

مش عايش على عود الورد

ولكن بيسقيني الحرف العرقان

بارجع فارس .. حارس ..

للحلم الطالع، الزارع لجميع الأرض

بانده أصحابي

ييجوا .. على بابي

من .. شرقًا .. غربًا .. بيشوفوا

دمعاتي عذابًا في عيون أحبابي



صهد ولافف راس الكلمه في صمت وحكمه

بيبخ ف سدري تخديرة رعب

أجراس .. حراس .. بمداس:

اسمك .. ما اسميش .. ما اعرفشي .. هؤلاء الناس ..؟؟

حتى الأجراس العاليه

صامته .. صامته

في ودان الناس العاقلين



العقد .. صراخ

السدر .. صراخ

والجرح بينزف كلمة حب

كلمة حب وشابت .. واتحرقت في حنك الصهد



صهد .. وناس .. حراس

اسمك .. ما اسميش .. معرفش .. ؟!

وتغيم الدنيا ف رمش ..

و ف نظره ..

تتكوم أحلامي .. حزمة قش



لاكن كبرت فرعة ورد وغطى العطر جبين الصهد

مشيت على كل ضفاف التلج

ما خافتش الشمسيه اللي ف راس البرج

ولا ناس البرج

ولا ضل البرج



الورده بتقدر تتكلم .. وتقول الصح

إن جالها ذكرى الفارس لما حصانه انداس

بتقول: ياما ناس قد راحوا مع غيرهم ناس

وإن جالها ذكرى الفارس والجرح

تفضل تحلم بالصبح

والجرح منوّر

وبينعس بين الأحضان اللي بلون الفجر

تفضل تحلم على سدر الناس

وتغني الصفح

ما أحلى تواريخنا

و كمان .. مواعيدنا

وعيدنا..

مواعيدنا لينا ف ليالينا الجرح ..

ولغيرنا شربات الفرح







...الجرس



عنقود كلام .. زي الجرس

فوق الطريق

دندن بصوته البرتقالي للقمر

صهلل بروح مليون فرس سواح بيلضم في الغنا

طاير في قلب الريح بيقطف م الندى

ويحش قلب الخوف ويرمي ع الجبين:

ضلي أنا ..

ضلي اللي فارش مصطبه ..وعيال بتنده للنسيم



صوتك جرس ..

واحد بيدن جوه مدنه من نحاس

صحيوا الطيور ..

صوت الكناريا خلى غيط الشوك سنابل ..

شمس تكبر ع الغيطان

الكلمه فارس فوق جبينك مبتسم ..

والريح عيونك .. والجرس

همّا العيال .. صحوا القمر ..

طاطى القمر يشرب رنين الكلمه اللي طالعه مسنبله

من بعد ما كانت بتصرخ تحت ضل المشنقه

آه يا بلدنا ياللي قلبك غيط شجر

دا ف كل ليله الكلمه يحبل بين فروعك قلبها

ييجي القمر ينقر ف سدرك .. كلمي .. هوه القمر

هوه القمر..

هوه اللي كان مشنوق في غيط المستحيل

جاي النهارده من بعيد ..

يغسل ضلوعه تحت سدرك من جديد







شطرنج



- كش ..؟؟

يا عساكر خطوه لخلف ..

خطوه لخلف

وبلاش قدام .. قدامكم نعش

- كش ..؟؟

قدامك .. أقدامك خوف

قصرك ح يدوب في التلج

وف سدرك كلمه بتتمطع .. بتحاول تطلع ..

لكن في الركن مطب



كش ..؟؟

لو تدخل خاوي الجيب .. حاتموت

حرك أيامك .. أحلامك .. قدامك نسر

يتمطع وجناحه تابوت

فارد ع الرقعه حكايه رعب



كش ..؟؟

إحمي عساكرك .. من ألف مطب

أنا شايف بنادقهم ورصاصهم قش ف قش

وعيونهم .. بتحاول تتغلب على حزن الغلب

ويا حسره .. عيونهم بتحاول لكن بتشيب

حتى خطاويهم .. في علم الغيب

- كش ..؟؟

دخنت سجارتي ودخانها سحابة جبن

خايف أرجع مهزوم .. وباجر على كتافي القهر



- كش ..؟؟

- الخوف مش عيب

- إن كنت تخاف من بلدك تبقاش لعيب

إلعب غوط .. غيب

إحلب عناقيد الغيب

حرك فيلك .. على شط النيل

- قدامك بحر ..

لو عديته .. ح يركعلك طول الليل

ويدلدل عناقيده نجوم .. وتمص الشهد

وإن خفت ..

حاتضيع الأرض



- على فين بتوصل رقعة شطرنج ..؟

- الشاطر يعرف ..

بس ما يطلعش البرج ..

دا لأن الأمريكا العظمى لسه واقفه فوقيه



على فين بتوصل رقعة شطرنج

الشاطر يعرف ..

والعاجز يسأل

إسأل ده ..

- مش عارف ..؟

طب غيره .. غيره .. وغيره؟!

آه .. يا عجزه ..!؟

لفوا الرقعه السودا

حاتلاقوا السنانير .. غامزه

لكن ناقصه الإيد اللي تشد الخيط

لفوا الرقعه السودا

شيلوا قتلاكم من فوق كتفي المشلول

دا لإمتى حافضل شايل قتلاكم ..؟؟

غموا عيونكم بالليل .. والويل

لما أجري وسطيكم بحصاني الأصلع

بحصاني المنزوع الريش

إحموني بكلمه تعيش

إحموني بكلمه تعيش



كش ..؟؟

مش رايح أكش ..

لو تغلب مش عيب

لكن دا العيبه تكون لعيب

وتشيل في ضلوعك نعش ..







...الانتظار



مص الخريف خد الربيع جنبي

رقص السهاد فوق دقة الحيران

فين .. فين أنا

والليل بنادق نصها ف قلبي

فين .. فين أنا

ونا وسط شارع حزني راكب مشنقه

مص الخريف عود الغنا الفرحان

ونا جوه قلبي شرنقه



حزمة رطوبه اتنفست جنبي وقلبي ع اللي عايز حلم

أسقيه: دفا الكلمه

أسقيه: ضيا نجمه ونجمه .. بس آه لو كان يقول

لو كان يقول فين سكتي ..

فين سكتي للحلم ما تقوللي؟

ما سمعت غير الصمت بيمصمص .. في غنيوتي

ما شفت غير الريح بيقصقص في تعريشتي

ليه يا غناوي المستحيل شبتي

شيبتي .. ولسه الفجر متلون بتنهيدتي



فين فين أنا وفينها كمنجاتي

أخد النسيم آهتي على كتفه ودار .. دلاّل

لعبت رياح الصمت

نزفت جراح الحق

شابت عيون الخلق

غطت على الموال

نسجت غطا أزرق ولونه لون صرخاتي

فين فين أنا و فينها كمنجاتي



رجع النسيم راكب فرس أخضر

شاورت عيون الشمس

لمست صوابعي عقدها اتفرفط على سدري

يا شمس يا شمس النغم دلي النجف سلم

فين سكتي للحلم

خربشت أنا في الريح وآه يا إيديا ما تحشي

حشي الجناح الريح ما بيعيشي ولا حتعيش إيدين خايفه



وحلمت وش الفجر

كانت مراكبي م الحرير ..

كان المراكبي نجم حاضن نجم

الحلم بيطارد سواد الحزن راكب فوق حصان

شمسي

ما تحس يا إنسان أيا جدران ألم جوايا ما تحسي

كانت كمنجه من ضفيرة حزن ملفوفه على حسي

كانت كمنجاتي شجر وسط المطر تدبل

أما غريبة .. إيه حصل؟

قلت الخريف ملعون؟

ويهون عذاب الصلب ع المحزون وللشاكي عذابه

يهون

إن كان عشان الانتظار



حزمة رطوبه اتنفست جنبي وقلبي ع اللي عايز يحب

قلبي على قلبي في درب الخوف مهوش خايف

قلبي على المشلول وبيغرد

قلبي على المحبوس في سجن الليل بيبوس ديل النجوم

ويطمن الخايف



الحلم في عروق الطريق زغرد

زغرد في ميتم حزن

طلع الصباح أفراح سنابل قلبها بيحن

بيحن للأمطار

طلع الصباح يحلب شعاع الشمس من سدري

شقت عيون الناس شبابيكي

كئني حابس طير فرح

ولا كنت حاسس بالفرح

طرقت عيون الناس شبابيكي فتحت لهم

قالوا حداك الطير .. ودا لينا..؟



ملعون يا قلبي حتى لو حتمشي في جنازه

ملعونه كلمة صهد لو ما تصد أحزان الجنازه

ملعونه كل الأرض

إن كان مفيش فيها انتظار

الانتظار للشمس لما سدرها ينشق

الانتظار للحب راح يتنفسوه اتنين

دا يهون عذاب الأرض في دنيا الخساره

إن كان عشان انتظار



إيه يا قمر مستني إيه بالليل

قال القمر ..

مستني وش الصبح لما يهل

مستني لما أنوّر سكه

لحد شموسة الصباح ما تطل







الكوبري



.. واتهزت خطوه .. هزت راس البرج

مين اللي بينده ..؟ قلبي اترج

"اسمك" ..؟ عدي

عديت ..مديت يدي

يا أرض ميعادي يا حبيبتي يا مو العقد

لا هو ياسمينه .. ولا غصن الورد ..

غير بس الحس بيحرس ع القلعه الشرد

واتهزت خطوه ..

هزت بطن الأرض



كان الكوبري بترقص فوقه الفوانيس

وعيون مقاييس ..

بتقيس كام خطوه .. عداها المتاعيس

ونا ع الكوبري حوت هربان م الموج ..

.. الموج ترابيس

وأنا وحدي من غير متاريس

ضلي شابك نخله بفرعين

تنهز لما انهز ..

تتأوه .. لما أتأوه آهتين ..

ولا فيش أنغام

غير بس صدور بتدور فيها الأرقام

وف نن عيونهم ..

شايلين الصمت



الليل حراس ..

والعين أجراس

دقت ع الكوبري اتلموا الناس

"اسمك.."!!

- لا ف إيدي عروسه ..

لا ف إيدي كتاب

ولا باحلم تتفتح قدامي الأبواب

"ما يهمش .. اسمك..؟!"

- اسمي .. وشمي أهو:

عصفوره بنص دراع

لا با اجدف ولا ليا شراع

"اسمك .."؟!

- اسمي يا حسره نسيته

اسمي تدوّر عنه بين الأرقام ..

ع الكوبري دايمًا بامشي وجنبي العربيات

وف قلبي تبات حكايات

وف خد الكوبري ماشيه بنات

وشمالي شونات القمح يلقط فيها الكرباج

واتنين بيحبوا الطير ..

واتنين حابسين الطير

أنا با أحلم ولاّ أسير

"اسمك" ؟!..

- اسمي ..؟.. اسمي جارفه الموج ع الشط

والليل حراس ..

ولا فيش أجراس حاتدق

ونا ماشي وسط الناس

ضلّي سنابل إحساس

على قلبي مداس

بتزغرد جوايا طيور الأحزان وتقوللي سماح

وف قلبي شونة صمت

وف ضلي خطاوي كتير ماشيين ساكنين الأرض

ولا واحد ع الكوبري ف كتفه دراع .. أو يد

"مين اللي بينده" ..؟

أنا واقع جوه الجب

المغرب يدن .. والناس حا تحب

ونا قلبي ولع كل الفوانيس ولا حب

قلبي طيور بتغني لكل الأرض

"اسمك .."؟!

- أنا حبة أرقام ..

تجمعهم ..

يطلع واحد مجروح القلب







نخلة في سدر الريح



أنا حاضن نخله ف برج الحرف

تنهز وترمي التمر كتاب

- إزاي نقراه ..؟!

انهد الباب .. واتلموا الناس ..

وقفم صف

- إزاي نقراه ..!

إياكم تبدوا من كلمة .. آه



حنجرة الريح التايه بتجرح وش الصهد

وحبيبتي اللي نهودها بترمي التلج ف ضلع الخوف

فارده ضفيرة صوت

بتشد حناجر صاحبي الريح ..

.. وما حدش رد

ونا حاضن نخله بترمي الحرف بنات

وبتولد أولاد

عرفم ما يخافوا وشوش الأموات



بعت حروفي ف ليله لصاحب مصنع كلمات

تاجر في حروفي وباعها لملوك الخوف

حبسوها ف قصر التلج وغطوها بكفن الأموات



لكن م الصهد اتعرى قلب الحرف

وقابلته ف سكة أصحابي بيتكلم ما يقولش الآه

ونا حاضن نخله ف سدر الريح

تنهز وترمي التمر كتاب ..

- إزاي نقراه ..؟!

إياكم تبدوا من كلمة .. آه







جنينة ورد ..



قلتولي استنى ..؟!

قلت لكم .. لأ ..

راح أبدر فستان الفرح

واخلع فستان الجرح

واخلع من راسي الشمسيه وحا تعصب بالصهد ..

قولتولي .. صعب ..

قلت لكم حكمه ف بق الشعب بتكبر تبقى جنينة ورد

يمكن حتقولوا ازاي ..!؟

ما زايشي، اللي بيحلم دايمًا حايشم العطر

قلتولي النجمه بتحبل بالحزن

بتنام على كتف هلال مشقوق الراس

قلتلكم لأ ..

وف صوتي حبلت أجراس .. أجراس

أجراس ف الحلق بتولد ناس

وبتولد دنيا مافيهاش حراس

قولتولي استنى .. استنى ..؟!

ما تشدش حبل الريح ..

شديته ..

قولتولي حا تخاف م الريح ..؟

خربشت الريح

قولتولي استنى ..!

قلتلكم .. شبت

ونا باحلم ألقى اللي يغني

والشاعر ده

شوفوا ..؟!

غاسل قلبه ف غيط الشمس

وف بطن دراعه الهمس مصدي

وف سدره العصافير بتطير وتشد ضفيرة نجم

الشاعر ده ..؟!

مش زي الشعرا اللي بيرموا الخوف في حكاية حب

ويبيضوا الهم

الشاعر شعب

الكلمه في حلقه شراع

ينفضها ف عز الريح







الضل .. والكناريا



نزلت على كتافي النجوم ..

نخيت بها ..؟

فرد القمر خيطه المفمفص فوق طريقي .. وابتعدت

ومشيت لوحدي ف أرض بايشه ف حلمها

وبين ضلوعي دنيا عايش حزنها

طاطت عليا من الكناريا واحده بنت

هفت عليا بشعرها ..

وفوق عيوني شفت ضلي .. ارتعدت



أنا طفت دنيا عشت فيها بضحكتي

وف سدر شمسي وفوق بزازها قلت آه لو كنت أعوم

لو كنت أرجع سندباد ..

والبحر يبقى ف إيد شراعي .. دنيتي

عادت حروفي من الفراوله معنقده كف النسيم

ونسيت في قلبي سندباد

محتار في ريح الخوف لوحده ع الجبل

ونسيت ضوافري في النجوم وف كل ليله صرختي ..

مين انقتل ..؟؟

طاطت عليا من الكناريا واحده سوادا

غرزت في قلبي ضفرها ..

لكن يا قلبي كنت فقت ..



ورجعت محني ويا ضلي مش بخاف

كل الكناريا جوه سدري بتجرحه ..

والفجر واقف مطرحه ..

ينحت عيوني بالطواف ..



وف كل ليله جوه قلبي شرنقه

تفتح جناحها تحت ضلي اللي بقى

الضل فوقه مشنقه ..؟!

الضل فوقه مشنقه ..؟!







الخوف



حبلوا ف سابع يوم .. مش تاسع شهر

وف كل جنازه ..

اتلموا جنب الميت ..

ولا شاوروا ف يوم ع البطن

يمكن كانت بنت ..؟؟

لأ .. كان واد ..

كان عيّل عمره ما راح الكُتاب

لكن بيموت م الحرف

حبلوا ف سابع يوم .. مش تاسع شهر؟؟

ولا شاوروا ف يوم ع البطن

يمكن كانت ليله ف حضن القهر

الخوف عيّل ولدوه الرجّاله ؟؟

إزاي ..؟ ماعرفش







سعيد مهران

بطل رواية اللص والكلاب



ديّتها طلقه وينتهي عصر العذاب ..



ريت السما تقفل بيبانها تسد وشي بالضباب

كافر .. كفن قلبي مدينتي .. فيه خلاص

قولوا ..

دا الكلمه مالت ع الطريق تنزف

قالت يا ناس أنا بنت ناس

غطوا شبابي واستروا قلبي



ديّتها طلقه وينتهي عصر العذاب ..



واتدحدرت دمعة أمل طيب

ولا كانش ليها ع الطريق أصحاب

ما نقولش زي عيال بلدنا في الربيع

ما بينكسوش بالورد

لكنما كانت لشمس الصيف

روايح خوف

أما سعيد مهران

ما قالش لا معلهش أو طيب

قال يا طريق خدني مع التايهين

خدني مع التايهين .. ونسيني

يومها السما تفت على عيوني

أما الكلام

كان زي ما بنقول في أحلام المسا:

قلبه انطفى

وف كل حاره العتمه حبلت بالسكات

مات ..؟؟

وازاي تموت طعم الجدور في البحر

إيه .. انت ميت ولاّ إيه ..؟؟

الصوت مفيش .. لاكن إيديه

حاضنه الحروف أيام ما كانت قلب رب

الصوت مافيش لكن رصاص الخوف مدب

بيدب أو بيهب .. مات الواد

والكلمه خجلت من دماه .. قالت أحب ..؟؟

آه بس مين .. مين اللي أحب ..

مانتش بطل ع الصدغ حافرينك

مانتش بطل

أمال .. جبان ..؟؟

إزاي دا نسر الخوف جناحه ما انفرد فوقك

فطت بنيه من الكلام زي القمر لكن بتبكي ف سرها

وتخبي دنيا .. دنيا خضرا ف سدرها

قالت يا ناس .. أنا بنت ناس، فين الخلاص!

غطوا شبابي واستروا قلبي



ودع صحابك يا سعيد مهران ..

ودعتهم ..؟؟

أدخل على مراتك وبوسها ف خدها

ملس على كتافها اللي معجونه بحرير ياسمين

إزاي يا صاحبي

هيا دي .. آخر دقايقي ولاّ إيه ..؟

ودع صحابك يا سعيد مهران

ودع حيطان الدنيا كل الدنيا لفت نفسها ف أحزان

ودع صحابك يا سعيد مهران

الفجر مشنوق العيون

لو غنوا ليه ما يطاطي نوره ف كل أرض

الأرض حبلى بالمشانق جدرها هوه الرموش

بتشد .. تخنق كل نظره بتتولد ..

الأرض ياما حلمها يفتح عيونها ريح قوي

الريح قوي

الريح قوي

الريح بإيده شد أجراس الحداد

واتعرت الستات

والنهد كان اسود .. حداد

كل النوافذ عتمت

أما اللي فيها كان حكاية سندباد

بيطوف لكين الحلم ضله المشنقه

بعد الوداع

كل الحواري بتنتني جوه الصراخ

أما النجوم

كانت عرايس فوق محيط الخوف

تهمس لنسمه وألف نسمه تقول لي هاتوا ..

إزاي أجيب قلب القتيل

دقة فرح كالها النباح



وقت الوداع

عشرين فانوس طاطاوا

أما العنين كانت بتلمع

جوه البلاطي السودا أكتر من سواد الليل

إيه يا حواري اتنفست دم الخريف في الصهد

إيه اللي ماشي فوق خدودك .. بصي شوفي الصهد

إن كان دا خوف قولي

ما تقومي ياللا ووشوشي باقي الحواري

مالك كدا ساكته

كئن الدنيا مولوده عشان تسكت

- اسكت يا شايل نسمتك باهته

إضحك وبعدين قول اللي عايزه

قول اللي عايزه للحواري

- حتى الحيطان عايزاني أكدب

مالت عليا زي ضل الصهد فوق قلبي ..

عجيبه .. إتفرجوا ..؟؟

طيب يا كلمة حب دايسك غصب عني

فين الحقيقه

وبتضحكوا ..؟؟

لا مش غريبه أي حاجه ف قلب دنيا بتتزحم

.. بوشوش رخام .. أعلام بنفسج فوق رموشها

مكحله بالدم

رشوا الكلام .. وبأي معنى زيفوه

ديّتها طلقه وينتهي عصر العذاب ..

- إزاي يا قلبي ياللي بلا شباك

إزاي يا قلبي ياللي اتولدت رجعت ميت من دقيقه

ديّتها طلقه وينتهي عصر الخساره ..

إخرس يا قلبي الصهد فارس ع الحيطان

والضل ألف اتنين تلاته بينتنوا

لكني حا اقتل أي جرح يفوق

ولفوق لفوق مكتوب أمل

ولتحت حا انحت مستحيل

قالها سعيد مهران .. واندس ما بين الزحام



آه .. فين تودي مركب الغرقان؟

من فين طريقك يا نغم ..؟

.. غطي على الأحزان

إزاي وكل الدنيا بتزغرد جروحها فوق جبينك يا صبي.



آه .. فين تودي غضبة الإنسان..؟

من فين طريقك يا غضب؟

قال الغضب:

تلقاني كلمه بين كتاب



من فين طريقك يا نغم عطشان ..

مش من هنا .. أحسن هنا الإنسان ملوش ديه

أيوه ف زمانّا كل شيء أصبح بلا معنى

تفرح ما تفرح ..

أخرة نهارك ليل بيجرح

وبرخص أي تراب تجيب كل ما اتسمى .. أمل

ولمين بتبدر ضحكتك .. ومين حيشرب فرحتك

دا كل شيء بيخون ..

- ودع صحابك يا سعيد ..

مين بيقول دول ..؟

ياه .. هوه لسه فيه صحاب، قول

قول .. قول كمان .. يمكن أصدق

- ودع صحابك يا سعيد مهران

إخرس يا كل لسان

جايب كلامه م النحاس

صحوا بقى حراس بلدكو

خلوا الرصاص يخرق عيون الصبح

لو تنحتوا من تحت ضلي المشنقه

لو تطعنوا بالرعب قلب الشرنقه

الصبح ماشي وفوق دماغه التاج مشاعل م الكلام

دلوا على كتاف المسيح أجراس

لو تخلقوا جوه القلوب صلبان



ركع الضباب ركعه على كتافه

غطاه بكلمة حب نديانه

ماشي الغريب .. وفي نظرته راح يتخنق إنسان

وبينولد إنسان

وتفوت عليه نظرة بشر زي الرصاص تخرق سمارة جبهته

ناس .. ناس وياما كلهم غربا

حتى سؤالهم زي همس الليل غريب

عايزين تقولوا بلطجي؟

ما تصدقوش ..

أصل الكلام واكل رموشي م القرايه

عملت سحابه في العيون

ناحت بتعزف .. أو بتنزف كل شيء .. أي شيء

الكل دايمًا زي بعضه

الكلمه قالت يا سعيد ..

.. الشمس تشرأ في القفص زي الكناريا

إشحال بقى القلب اللي حلمه في الخلاص

الكلمه من بعد ما انطلقت خلاص

ريشها انتفش

طارت ورفت فوق سعيد مهران

لكنها رجعت وقالت آه يا ناس

.. طلوا عليا في القفص

وقالت يا ناس .. أنا بنت ناس

غطوا شبابي واستروا قلبي



رفع الولد كتفه اليمين

دفن الولد قلبه الشمال في الليل

رفع الولد عين الطبنجه

طلعت رصاصه بتنتفض

تنفض دماغها في الحيطان

- حتى الرصاص بيخون كمان

- مين اللي مات ..؟؟

اتكهربت كل الشوارع بالصراخ

اتشندلت دقة فرح

أما الحواري كلها ..

كانت بتنده حلقوا

صفاره بتشق السكوت

ترجع بتنتفض رعبها ..

والليل بيفتح جبهته

- إمشي مبارك كل واحد ينتقل

فانوس في حاره قام مطاطي يشوف سعيد مهران

الضل محني ع القتيل

كان العويل زي الفتيل

تحت انفجر

فوق انفجر

ويا العويل قلبي دراع .. شق القمر

ما عاد أبو مهران بيتكلم ولا يعشق

خيمة أسى بتعرق على الأسفلت

خيمة عزا تندق في ضلوع الزحام والصمت

مين اللي راح يدخل يعزي في العريس؟

ما حد راح يدخل ..

ملعون يا قلبي

اللعنه لاجل الضل يسكت، يبقى مدنه من الكلام

فضلوا يعلوا لفوق .. لفوق أعلام ورق

أعلام ورق

أعلام ورق

لكن مفيش يوم من الأيام قرينا فوق رموشها:

إيه نكون ..؟؟

حزمة عرق ..؟!

حتى الرصاص بيخون طريقه زي ما يخون البشر

- مين اللي مات ..؟

عيّل في عينه من القمر بسمه

- مين اللي مات ..؟

كل الحواري دلدلت عينها اليمين .. عينها الشمال ..

عجزت ولا قدرت تشاور ع القمر

مخنوق في حلق الواد

- مين اللي مات ..؟

عيّل مخلف م القمر أولاد

كل الحواري كلها

عجزت ولا قدرت تنادي سندباد

ولا تستغيث

غير بس كلمة رعب قالت: حلقوا ..

- مين اللي مات ..؟؟

الريح جبان ما قدرش ينطق

والكلمه ولدت في السكات

ولدت ولد أخضر لكين الدنيا مش صيفي

ولدت ولد يشرب ربيع خوفي

- مين اللي مات ..؟؟

مين .. ياللي والدين الحزينه أمنا

الليل جبان! .. والخوف دا وارثه مننا

لو تنطقوا ..

لو تولدوا .. الرعب حتى في السكات

لكن مفيش ..

والكل مستني ميعاد الصلب



الشمس مالت تشتكي للأرض علتها

الشمس زيك يا سعيد مهران

لا تهزها ضحكة سعاده أو تكرمشها الرياح

طاطت على أرضك بتحكي لها ..

- إسرق خيالك يا سعيد مهران

إبعد خيالك عن خيال المهزومين

دول كلهم ..

طول الليالي بيسكروا بالرعب في الكاس الحزين



من بعد ما سكت الرصاص

الريح .. رجال خايفه

خايفه تطاطي لاجل ما تشوف الحقيقه

إنزع ضلوعك يا حصان الخوف

فرفط شعورك كلها ..

سيبها تشندل في القلوب الموت

خوفي .. يا خوفي تكون جبان

زيي تمام زي القمر .. زي النجوم ..

زي اللي باعوا للربيع طعم الخريف ..

كل الحواري اتنسمت أحزان

كل النسا دقت على صدورها الرخامي ومين حينطق بس ..

دا الصمت قلعه من نحاس ..

لو ريح خفيفه تهزها ..

لو ريح خفيفه تهزها



نخ الكلام ع الأرض ..

بخت في وشه ألف حكمه في السكوت

ماقدرش أقول العجز ..

العجز كان كلمة ندم نشفت على ضلوع الفقير

أما النهارده ف كل ثانيه ميت فقير

بيضيع .. يبيع الروح بكدبة مستحيل

ماقدرش أقول العجز ..

إن كان دا ليل طوله بطول العمر

تبقى المآذن دي اللي واقفه فوق ضلوع القلعه وقفتها الطويله

واقفه في ذل بتدعي دعوتها:

لو كان حتمطر .. يبقى ح تمطر .. ذل ..







الضل .. والكلام



ما حلا الكلام لو كنا نقدر يوم نقول:

إن القمر نايم في عشه من العيون

إن العيون دي كلها بتقول:

بعدك يهون

بس الاكاده الصبر ضله في الجفون

ما بيتمسحش ..

فوت .. فوت يا قمر على عشش الصفيح

وازرع ضفايرك ع البنات ..

حلم أفراحنا الجريح



لو كنا نقدر يوم نغني للنجوم

من غير ما نجرح سدرنا

من غير ما نبكي تحت ضل المستحيل

ننسج مصيرنا اللي انتقل بالدمع والصبار

ليه .. ليه بنجرح سدرنا ..؟

نخلق كلام يرجع بينحت عمرنا

أمطار .. مفيش أمطار ..

مع إن بحر الدمع سايل ع الورق أنهار

كل اللي ممكن نزرعه

كلمة فرح .. آه بس ما تجيش الضوافر تنزعه



أقدر أقول إن القمر في الليل شهيد؟؟

ما تصدقيش في الليل شهيد

وإن اللي سقطوا كان في عز الصهد

بس الاكاده الشمس خبت وشها

مش م الكسوف .. أو خوف



ما حلا العيون لو كنت يوم أقدر أشوف

ضلي أنا ..

من غير كناريا بتنزعه

من غير حروف الكدبه طالعه تخنقه

من غير دفاعي واتهامي للغنا

مين .. مين أنا ..؟؟

أرغول؟؟ .. مانيش أرغول

لكن في حلقي لسان ونفسه يقول

كلمه لقرص الشمس ..

وكتير كمان ليهم كمنجه من ضلوعهم عزفهم

يا دهشتي بالهمس







... القمر ...



كان القمر أيامها شعره مشمشاوي

كان القمر ابن الحواري البرتقالي

لابس طاقيه

معووجه عوجه معجباني

قال القمر للناس تعالوا اتفرجوا

لما النسيم يحدف شعوره ع البنات

والغنوه لحنه ومخدعه

كان القمر أيامها ما يشيلشي الهموم



كان القمر ابن الحواري اللي شابت

فارش ضلوعه ع المصاطب

سهران يسامر في اللي دايسهم زمانهم

سهران بقلبه ولسانه يقول كلامهم

أرغوله يتنفس حزايني

وعيونه تسرح في المتاعب

كان القمر أيامها طيب وابن ناس



كان القمر صاحبي اللي يحدف لي المشاعر

كان شعوره فرشتي

وإن كان مسافر

أفضل أصلي لرجعته

كان القمر أيامها ما يحبش مظاهر



كان القمر فارس خطفني فوق حصانه

نيمني .. بين حضانه

ياما عطاني من حنانه .. وقت ما غلوا الحنان

كان القمر دا صاحبتي

ياما حدفتلها الأماني ويا زهر البرتقان

فستان بنقشة بهجتي

لبستها طرحة حناني

والبسمه كانت عود ريحان

يا صاحبتي .. يا مو الضفاير نجمتين

متبحترين فوق الكتاف

لو تلضميني ف خيط حريري من النسيم

وتعلقيني وردتين فيهم شعاع

وتكحلي بيا رموشك وقت ما يطول السهر



رحت اليلا دي لاجل أصلي للقمر

وابدر حناني تحت مشية خطوته

كشر في وشي وقال لي روح موت .. انتحر

بصيت لقيته كل صاحب أعرفه

إيه يا قمر ..

ليه النهارده سبت شباكي بستايره معتمه

دنا كنت زارع ليك شبابي ورده حمرا ع الشجر

دبلت عيونها م السهر

ونا كنت صارر جوه منديل الأماني

ياما صحابي كلهم طلعم غجر

ورجعت شايل فوق كتافي المحزنه

حابس صراخي ف بسمه شايبه مكرمشه

لا ليا صاحب اشتكيله أو يقول لي مين أنا

أو ليا ضحكه منعنشه

آه .. ابعدوا عني القمر

باكره أشوفه .. صدقوا عيّل يتيم

ضحى بقلبه لما فرفط كل كلمه فيه نجوم

علقها فوق سدر الصحاب

آه .. ابعدوا عني القمر



دي الوقت حيقول القمر عيبه عليك

ويدلي شعره ع الكتاف ويقول غزل

لا يا قمر .. مافيش عتا

الموضوع الأصلى : الشاعر مجدي نجيب  المصدر : قيثارة الغناء العربى

الحب في زمن الحرب



... الطبعه الأولى عام





مصر



اللي تتسمّى بكل اسم فيه نبض النضال في وريد ولد

االي ضلها من فوقينا زي أم ملهوفة على ولادها

عمره ما ابتعد ..



الحنونة. الرقيقه. البشوشه. العنيده. الحزينه. السيده

من أيام ما كان الفراعنه بيحفروا أجمل أمل

متبسم على الأحجار

رمسيس .. وأخناتون ..

والحضاره

العلوم اللي مولوده وياها مناره



باعرفها

باعرفها من بين كل شمس ..

من بين كل ليل

من بين مليون نهار

أعرفها لما تمسك الأوتار

تسهر وتعزف

وتطرح فوق جبينها ضحكة النوّار



"إنت المدلل يا قمر وفي وصالك

قلبي متيّم يا قمر عاشق جمالك

إسهر معانا يا قمر

خليك معانا يا قمر

إنت المدلل .. يا حنيّن .. يا قمر"



يا كل ليل إسود مش حنون ولا أخضر النجمات

ما بنحبكشي يا ليل إنما

إطلعي يا شمس الصباح على غيطان الدره والقطن

إحنا يا ناس شعب طيب .. وطيب ساعات

وساعات نبقى ضليلة أمان .. وساعات

نبقى على الطريق متراس .. في الرايحه وفي الجايات

إحساسنا كالغيطان والمدن لما تحلم بالسلام

وبنعلّم الأيام

إحنا يا ناس .. ناس.. ما بنامشي

ما بنامشي بلا أحلام



من زمان .. من زمان بيعرفها

بيعرفها من زمان

من زمان يا حبيبتي

من زمان يا حبيبي

حبينا بعضنا

ومشينا ويا بعض

وعرفنا بعض

ورغم الورد اللي بشوفه ف حضنك أيام دبلان

برضه نقشنا أسامينا زي العشاق على كل الورد

وعلى السواقي الحيارى

وع الشجر

وع الطرقات وفي الغيطان وفي الشمس والمصانع والأحلام

وع القمر اللي مبتسم للسهارى



صاحبتي .. حبيبتي .. صاحبتي

في رحلتي ف يومي ف غربتي

باخج بإيدك .. تاخدي بإيدي

واشوف نظرتك دايمًا سعيده

وإن جت تزورنا محزنه ولاّ .. في يوم تنهيده

بلاقيكي يا حبيبتي بتاخدي بإيدي

وسوا .. سوا ..

بندوس على ليل التنهيده



من زمان .. من زمان بنعرفها كلنا

بنعرفها لما تفرح .. ولما تبكي

ولما ترفع كتافها زي برج ويحط فوق منه الحمام



من زمان بنعرف بعض

من أول شهيد .. كبّر ع الزآذن

من أول فرحه .. عرفتها عيونك

من أول لمسه لإيدك

من أول فاس .. شق كنالك

من أول طلقة غدر انطلقت على جسمك لاسمر

ونا باعرفك

من أول يوم اتولدت يابني كنت تسقيني من كفوفك

وكانت ..

لما أي محنه بتزورنا

أحس زي أي أم بالأحزان ..

أحزن .. وأحزن .. وأحزن .. ولما أشوفك

يضيع الحزن واسمعلك



في كل شارع هتفت

في كل مصنع ومدرسه وجامعه

حقيقي بنعرف بعض

وكمان ما بننكسفشي من بعض

لكن بنزعل كتير ويا بعض

لما نختلف

لكن بنرجع نتفق لو عدو حاول يمسّ الأرض

أول الشهدا، كانت شهادته بين إيديكي

وكانت كل أحلامه ملها مكحله في عنيكي

.. وكنتي الأمل دايمًا



التتار .. هزمتيهم

المماليك والأتراك والعثمانيين، طردتيهم

لانجليز والفرنساويه، قاومتيهم

وناس طيبين حبيتيهم وحبوكي

ما يملكوا أي شيء ..

إنما ..

ضحوا بكل شيء

"طومان باي" على بواباتك، أذكريه

عرابي والخيانه .. عمر مكرم .. إلنديم ..

النضال .. بالكلمه والنبابيت

وبالإيمان .. وبالديناميت

أبنائك .. عمالك

طلابك .. فلاحينك

مدارسك .. مزارعك .. مصانعك



وناديت .. ناديت .. ناديت

دايمًا عليكي كل ليل .. وناديت

ماخليتشي ولا حاره ولا شارع .. أو بيت

إلاّ ودخلتهدخات لاجل اشوفك



- إنت مين ياسمر الجبهه؟



- أنا إبنك وعاشق تراب أرضك



- يبقى إنت .. إنت اللي عشت معايا في المحنه



- ونا من أجل العيون السود

حافظت عالعهود

وعديت ياما ألف محنه



- إنت اللي كنت وحدك بتأكد صلابتك كل يوم

بتأكد صلابتك



- لإني بحبك .. وباعشق خضار رايتك



وكنت الاقيكي

أمي وحبيبتي .. وتلاقيني

إبنك.. ضناكي .. ونتلاقى

ونمشي من تاني مشوارنا الطويل

مره شوك .. نحصده

ومره حُب .. بإيدينا نزرعه

وإن ما كانش بنوجدُه

ومره بنقابل كلام غريب

نقف سوا

وسوا .. كنا بنرفض نسمعه

الحلو بس بنسمعه

الحلو يعني إيه؟!

يعني كلام بيقدر يعبّر عنك ما يخجلشي

يعني لما اعشقك ما اخجلشي

قدام الجميع وأحبك



أحبك ولا أخجلشي

صاحبتي .. حبيبتي .. صاحبتي

في رحلتي ف يومي ف غربتي

باخج بإيدك .. تاخدي بإيدي

واشوف نظرتك دايمًا سعيده

وإن جت تزورنا محزنه ولاّ .. في يوم تنهيده

بلاقيكي يا حبيبتي بتاخدي بإيدي

وسوا .. سوا ..

بندوس على ليل التنهيده



باحبك

مصرية العيون

سمرا مكحله العيون

باحبك .. وبيهون

كل شيء ما بحبش أسمعه







حادث مفقود التاريخ



لما الرصاص ينطلق

لما جبين الأرض والسما

والزرع يتحرق

والأبيض الناصع

يتملي بزُرْقَه

إيه اللي يبقى ويبقى



غير كل الرجال

والنسا والشيوخ وأصغر الأطفال

إيدهم في إيد بعض

وبيحلموا ببكره ..

وبطعم ريحة الأرض







رسائل قصيرة إلى العصفور الأسمر



غنّى البلبل في ضلوعي

نزلت كل دموعي

نزلت فوق أسوار الرؤيا وباش الحزن

- يا حبيبتي

هاتي إيدك نهرب تحت الأمطار



الليل مركبنا

والبحر كلامنا .. وملاحنا ..

نجم صغيّر أد العصفور

ورقيّق .. زي العصفور

ويحب النور

وإن شاف الموج محتار م الرعب ..

يطلع ويغني ..

ويصحّي .. ألف نهار

- يا حبيبتي

هاتي إيدك نهرب تحت الأمطار



دايمًا باحلم بإيدينا بتحضن بعض

واحنا بنجري وسط الشارع ..

وعيون الشارع فوانيس م الورد

والمطر نازل سلالمُه ..

والقمر حاضن صحابُه

والنجم واقف ع الجدار

- يا حبيبتي

هاتي إيدك نهرب تحت الأمطار



أنا في الأوده البردانه ..

راسي على كتفك ..

وانتي .. في اللحظه الدفيانه

راسك على كتفي

- يا حبيبتي

هاتي إيدك نهرب تحت الأمطار



شفتك في عيون الناس

وشافوني الناس في عنيكي

طِلع الليل يدّن

سِكر الصبح المحتار

- يا حبيبتي

هاتي إيدك نهرب تحت الأمطار



النهارده الصبح

كنت ماشي في الطريق

الشمس مونساني

زي ما تكون الصديق

والمدينه كلها

حاضنه أشواقي الكتيره

للأميره

ليكي إنتي

ياللي ابتسامتك

نغم حالم على وش النهار

- - فين إيدك نهرب

تحت الأمطار



المطر حرّك إيديه ..

المطر جوّايا

المطر جرّح عينيه ..

المطر جوّايا

المطر غرّقني ليه؟!

المطر جوّايا

خدني بقلبي

سلّمني للمسافات

وفضلت ماشي وانتي جنبي

وتهنا في الحكايات



واحشاني

الراديو والصوت الدافي

والصور اللي بيجري فيها اللون هربان م الضلّ الإسود

.. والنظره الصفصافي

والإيد اللي بتحيي الورد الأبيض



في الشتويه

طار العصفور الأسمر

حط العصفور الأسمر

وشفايفه ..

حاضنه الدنيا الورديه

الفرع الأخضر

إتحنّى بطعم البرد

وفضلت ماشي وانتي جنبي

وتهنا في الحكايات







مونولوج في مقهى ولعبة الأمراء



إلى صديقي في لعبة الشطرنج، الذي فقدته في زحام المدينة



كان مالي جناحه بأحزان

كان بيغني لنفسه أمانه .. أمانه .. أمان

ويداعب نجمايه أسيرة إنسان

لو كان

لو كان

لو كان

لو كان يا حبيبتي .. آه لو كان



كل العصافير

طارت بتمرجح أغانيها

على حبل الريح العطشان

تحدف منقارها في سدر الرمان

والدم عيونّا المليانه جروح

والريح ..

الريح الليله إياها الريح

بلع البيت الأسمر وأصحابه

بلع الضحكه اللي أصحابها شحتوها ف يوم

دبّل أشجار اللوم

طيّر أحلام النوم

واتبقى ع البيت الأسمر، على بابه

ذكرى النسيان

لو كان ..

لو كان

لو كان

لو كان يا حبيبتي .. آه لو كان



.. ولافندي كان عشق ناشىء

كان دايمًا يشوفوه في الحانه

منقوشه شفايفه

وعيونه جواها .. صور الناس

ماسكه إيديها بتتخانق



في الأتوبيس

أحذية الخلق بتتحرك وتقيس

وتقدّر كل المسافات

تِقْدر تحلم بالغابه

وبأي كابوس

وبإنك نتيجاتيف والصوره

ضاءت وسط الحكايات

طفوا كل الشمعات الوالعه

قتلوا الغنوه ف ضلعه

والصبار اتزرع في خدوده



إحنا بنقدر نكدب

شفت الدمعه بترسم عمره جوه عنيه

شفت إيديه

زي الصبار ف غيطان القلب العاشق

كِشّّ

واحشاني البسمه اللي ما تعرف تكدب

ما تفكرنيش بالوهم المفروش سجاجيد ع الأرض

لما قدرنا ف يوم، قدمنا نْصاص القلب لأجمل حب

وملينا جناحنا بأفراح

غنينا يا صاحبي المشوار، غنينا أغاني سلام

لكن بنخاف الحزن يشب ويملا عيون الأيام

إيه ما قرتش جرايد الصبح؟

هوَس المزيكا وذعر قلوب شبان العالم

سلبية حتى الحزن



ما لمستش بعنيك الجرح

الحب ما عدش سلاح

الحرف ما عدش سلاح

جناينهم يخجل يطلع فيها الورد

جناينّا بيطلع فيها التفاح

خجلان من دمع الأرض

في التاريخ القائم في صدور الكتب الصفرا

ليلة عشرين

ماشي في ضل الطرقات



ماشي من غير حكايات

مفقود الذكرى

مفقود التذكار



بتقول إن كان راح يرْضـ ..

مش ح ارضَى

لو كان راح تيجي العصر

وقبل ما تيجي

أتسلق سلم قلبي ف أيام الحب

واقطف ليها الفجر

لو كان حبيبي .. آه لو كان ..

إيه ذنبي؟!

بيموت؟!

قلبك محجوز في البيت

شجر التوت بيداري عيون الحزن

كِشّ

أخرتها

ديّتها الفارس ح يحرك فرسه ويتبعني

لأ ..

صدقني

أنا مره وبس

ليه

عندك حق

كلمات الحب قالوها الناس

سرداب الحب دفا

وأجمل كلمه تموت على نفس البُق

أنا قلبي وفا

من تاني ح نرغي ومن تاني نبص

طب كان لازم يَـ ..

كش؟!

كان لما يضحكنا أحس بقلبه المتعذب

كان عاشق

بيداري حبه المتغرب

ويحب النسمه الجايه من كل وطن ..

كان فارس

كان يركب أجدع مُهره

ويصيد النجمه بطلقة حرف

ويغني لصمت البحر يفور

إحنا ف عصر الصواريخ

إلملك الإسود هزموه ف بلاد التلج

والملك الأبيض هزموه في بلاد السود والصفر

كش

قلبي بيلوي شفايفه

بطني بتحضن كفي العطشان

إيه الصور السريالي داهيّا

كان إنسان

كاس كونياك

أكتر م الرقه

زي نسيم العصر بيعوج رمشه ف رقه

عاوجه رقبتك

يا غريبه وسط ولادك

عاوجه رقبتك بتغني؟!

لسه العشاق مساهير

لسه ف عصر الصواريخ

لسه بتقدر كلمه تدق المسامير

لسه بنقدر نصلب بعضينا

ندبح أمانينا

وبتقدر أيادينا .. تتفرق عن أيادينا



على كل جدار الحزن بيتعايق .. بيناديلك

صُرّ الحزن ف منديلك

غامض يا حبيبي

زي الأيام الموعوده

الكلمه الموجوده

التايهه المفقوده

مفقود الذكرى

مفقود التذكار

مفقود الإسم

وغريب بالنظره العطشانه زي الإيد الممدوده



قلبي بيلوي شفايفه الخايفه

يمكن أصطاد الموج

إيه الصور السريالي ..

كش

كش العصفور على فرع الرمان

لو كان

لو كان

لو كان

لو كان يا حبيبتي .. آه لو كان



كان بطّل يلعب بشفايفُه الزرقا

كان بطّل يطرد عن قلبه السقعه

إلبرد بيكبر ويّا الحب

إلترماي كان زحمه ..

وكابوس في عيون الخلق

كات قاعده قصادي بترقص في عنيها الوِحِدَه

أول مايو

كانت أول غنوه لأول عامل

كان واحد ..

كان نايم يحلم وف قلبه بتمشي الشمس

وباريس كات عيّل واحد

كات كل الطبقه

أسبانيا بتولد في السر الأشعار

وتقدمها ف صحن عليه نهدين بالدم



مصر

نهر النيل

أوراق البردي

أخناتون

95 ألف

لأ .. مش بالمِيل

حاسب براميل

آه عدِّي

لو كان ..

لو كان

لو كان

لو كان يا حبيبتي .. آه لو كان



دوّر له الخد التاني

مش ضاربَك

قال من كان .. آه يرميها .. يرمينا

وسابونا والدنيا تايهه ف عنينا

كِشّ

زرع الفرسان الرمح ف خدّ الأسفلت

ولا تزعل

في الزمن الجاي ح يِحْيُوا الإنسان

فما بالك الفيل



إن شحّ القمح

ما تفكرش كتير

ياما الخنازير اتغدّت ببطاطه

والسمك الإسود شرب القهوه

وف أسبانيا الدم ما كانشِ بيغري الأسماك

"جاك" كان بيدوّر في "الإسكرتا"

وف مصر ..

ولو فيه أقمار تتباع

أنا كنت شريتلك دسته

على رأيه

حنطفّي النور

فيروز

"خايف أقول اللي ف قلبي"



إستنّي

لسه مصرّه العصافير

تشرب م النبع الحالم

وتعدي على حبل الريح

إيه الصور السريالي داهيّا ..

بطّل تفاصيح .. يا فصيح

"جون" الإسود مات مقتول

"جاك" المسكين

لقيوه إمبارح ميّت جنب الصناديق

كِشّ..

مات؟!







ابتسامة



مع أول ابتسامه منوّره لشمس الصباح

مع أول ابتسامه لولد صغيّر ..

على صدر أمه الحنون، مرتاح

مع أول حمامه بيضا ..

بلون طرحة عروسه مصريه

طايره بيحضن جناحها نسمة الحريه

مع أول خطوة قدم

بتدوس على الألم

طالعه بلدنا بتنفض عن نفسها توب الليالي

شايلانا في عيونها ..

حاضنه شعبها الغالي

مع أول غُنا للشمس ع الأنهار

وفوق كل شارع ..

وجوه كل دار



نازله بلدنا للغيطان

رموشها سنبله خضرا

وايديها خير وحنان



ولما ييجي الليل

وتسهر القناديل

وتكبر المواويل على جناح النخيل

تسهر الإيدين على الأوتار

يسهروا الناس .. في كل دار

يباركوا يوم عمل عدَّى

ويوم عمل جَيّ

يغنوا للأمل غنوه

ويبنوا جناين ضيّ

مع الأمل

وصوت العمل

طالعه بلدنا للعمل

دايه على الأحزان

وف قلبها الإيمان

وف كفها سنبلة خير

بتزرعها في كل مكان







قمره .. على المدينه



يا قمره نبيتي

يا نجمة حُب ربيعي

يا نسمه ..

يا فرحه يا شايبه ما لاقيتي ..

غير خدي اللي بترقص فوقه دموعي

مينا وبيتك وسفينه

ومدينه ساكناها

كلمة حب حزينه

يا قمره بترقص على بيتي

فاتح شبابيكي

فارد خطوات العمر إليكي

باحلم بدفاكي

بسلامك لما بيتبسّم بين ضيّ عنيكي

يا قمره ..

إدّيتك

لكن أبدًا ما ادّيتي!







كان



في كل صفحه من تاريخ مصر المنوّر

إسمه ف كل حته منور

في مصنع .. كان صغيّر

في أحلام فقير معدوم، ما كانشي يتصور ..

يملك رغيف بكره

اسمه ف كل حته .. منور .. ونوّر

قلب فلاح بسيط الضحكه والمعنى

وزي شجرة الأحلام ..

مفرّع في الزمن لسه

فارد بسمته زي السلام

طارح مع الأيام

خُضره وأمل .. لسه

كان هو الحلم

كان الحلم بلون الشجره الخضرا وع الفرع حمامه

وبلون البيت المتلون بعيون بسّامه

وبلون النظره اللي بتطرد كل غمامه

وبلون الكلمه التي بتضحك في شفايف عاشق

وبلون فلاح في غيطان أفراح

كان زي الملاح

بيغني للموجه العاليه

ترجع على صدره وترتاح



كان أب حنون

جاي يعلّم على عَلَم الثوره .. نسر الحريه

ومصر ..

كانت أيامها يتيمة الفكره .. وحزينة النظره

تحلم ببطل ..

زي سنين الخير

وكان هوه ..

أول ما فتّح عيونه كان على ناس

أحلامهم كل ليله في التراب تنداس

أيامهم كل ليله ..

سودا مغبّره وعطشانه

حافيه وجعانه

ناس بيحلموا ببكره ..

لكنهم فوق صخور الجوع من غير مداس

وحب كل الناس

لاجلن تفضل مصر

بسمتها شمس سلام

صبح ومسا .. وعصر



يا شعب مصر اتكحلت لياليك

بكفاحك

وبجراحك

لا الدمع بات في عينك ولا قلت آه

ولا الآهات خصال فيك

رغم التعب والشقى

عينك على الملتقى

والرايه حاضنه فيك



رغم خيول الرعب اللي بتجري على وش خريطة العالم

والحزن اللي بيحفر مجراه، الجوع والفقر

كان دايمًا صاحب مصر، حبيبها، بيكبر ويكبّر

ضحكاته ما عرفتش تتوه

لكن عرفت تحزن على طفل ف خيمه

تتألم .. وتعلّم

مهما طال الحزن

ح تروح الغيمه



عيونه شباكين فرحه .. وقلبه

فدادين م الخير .. وقلبه

سنبله ضاحكه .. وقلبه

شمعتين في الليل .. وقلبه

دنيتي كانت في قلبه



لكن راح الصبح

إبن البني آدمين .. مات

أب الفقرا والعمال .. مات

واتولد الفجر حزين

حزنان ع البني آدمين



كان دراعه الطبيب

وكان كلامه الحبيب

وكان حضن بيضمّ القريب والغريب

كان كلمة سلام .. وكان غيطان أحلام

وكان كلمة غرام بتزوّق الفرحه

وشباكين م النور .. وشجرة خير في السنين طارحه

وكان القمر .. والهلال

وكان ابتسامه متوّجه وشّ النضال

وكان غنوه فقيره .. فوق جناح الموال

وكان قمر أخضر .. وكان عمل جوه المصانع والمزارع والرجال



الفكره ما تموتشي

الحكمه ما تموتشي

مشوار نضال ما يموتشي



ما عرفشي طول عمره الوداع .. ولا علمنا الوداع

ولا نبحب نقول .. وداع

الفكره ..

ما تموتشي

الحكمه .. ما تموتشي

مشوار نضال .. دايمًا ما يموتشي







مشتاق



لعيونك دايمًا مشتاق

لكلامك دايمًا مشتاق

للفرحه اللي بترقص على رمشك .. مشتاق

للشَعر اللي مبروز وشّك .. مشتاق



.. ولو

لو كان البحر حبر

والشجر أوراق

ما يكتبوا ربع اللي عندي ..

في قلبي من أشواق

مشتاق







صاحبي



كان صاحبي

مرسوم على قلبي

وكان لي بسمتي وشمسي

يغني ف ضحكتي وهمسي

ولما ما اتكلمش ف ليل حزين

تميّل عليا ضحكته ..

وعليّا بتمسي



كنت أعرفه

وكانت كل فرحه تزورني .. تعرفه

وكانت كل آهه ف قلبي ..

لرعشه جوه قلبه .. تسمعه



يتنفس

أشم الهوى الصافي

يتكلم

أشوف الحب متصافي

قريّبين من بعض كُنّا

زي الوطن والأرض

زي العطور في الورد

وكانت الفرحه بتزورنا

يضوّي شوقنا في عيونّا



غريبه ..

ليه بقول كنا ..

ما احنا لسه زي ما احنا

أصدقاء

تغربنا الليالي .. ونفضل غوالي

ولا نفترقشي

وكنا ..

جناحين لطير واحد

لما نتغرب .. تاني نتواعد

ليه بقول كنا ..

ما احنا زي ما احنا

أصدقاء







أغراب



أغراب .. أغراب .. أغراب

أغراب في الليل أغراب

أغراب على كل مينا

أغراب على كل سفينه

واحنا بنغني لفرحتنا .. أغراب

واحنا بنزوّق ضحكتنا .. أغراب

واحنا بنتكلم كلمه

واحنا حاضنانا النسمه

أغراب .. أغراب .. أغراب



أغراب والغربه سفينه

بحرها الشوارع

والمطر ..

والبيوت والقمر

ودمعة الشجر

وآهة المدينة







الفارس الأسير



(1)



يا وحدتي ..

ضَهْر القمر

بينخّ فوق ضهر الولد

وشه الحزين .. لامس شفايف وردتي

ملّس على كتافي ورقد

يا وحدتي .. وكئني لسه باتولد



ليلة شتا كان مصرعي

من غير ما ابارز ع الحصان

وسقطت جنب السيف بغني دهشتي

سالت جنازه ع الطريق

ترسم لي بيتي وسكتي

فارس صديق ..؟!

فارس مطارد م الحصار

وسقطت جنب السيف بغني للنهار

وللمدينة والأميره ف قصر أحلامها الرخام

يا وحدتي ..

وكئني لسه بتولد



أنا لسه باجري في الزحام

ضَهْر العذاب بينخّ فوق ضهر الصبي

سِكِر القمر بدموع صبيه يتيمه

وشّه الحزين لامس شفايفي في انبهار

رفعت إيدي للقمر:

إياك تشارك في الحصار

حيبوا الحرس

كان أول الطعنات من الأصحاب





(2)



أنزع عيوني لاجل أغطي برضه يا حبيبتي في الشتا

وانزف في سرّي لوعتي فوق الطريق من غير غطا

واهرب بآخر حرف

وافضل أصلّي في انتظار ..

ييجي نهار الصفح

ويفكوا ضلعي م الحصار

واهرب بآخر حرف آخر حرف

وبين ضلوعي دوّروا الأعوان

لقيوا اللي باقي م الأمير، الجرح





(3)



سبت العبايه شامه زرقا فوق حيطان القصر

ونزلت في السوق الحزين ..

أستنشق الغربه

إبرز خناجرك يا أمير

مش جاي لاجل اتقاتل مع الصحبان

سبحانه واهب السيف لإنسانا الجبان

عضّيت على قلبي المهان

ومشيت بعاري أعرضه

والسوق ..

تطويه عينيا وتفرده

مشبوه ..

هذا الأمير مشبوه

زي الأسير

تحجزني نظرة عنيهم السودا

مشبوه

أنا الأمير .. مشبوه

أنا اللي ياما مشيت وراسي في السما ..

أعلا من الأعلام

واستنشق الأحلام بطرف التوب

أنا الأمير

أنا الأسير

باغزل مصيري في الهروب





(4)



.. وهربت من سوق الكلام

سوق الكلام بيضج بالإصرار بلا معنى

(يا سبارتاكوس من غير ألم ماتثورش)

وركبت مُهري لاجل أبارز في الطاعون

الجوع في ضهري مش في بطني واسم خنجر باحمله "القاهره"

والرمح في دراعي اليمين

إبرز خناجرك يا أمير

ما اقدرش أكقر باليمين حالف يمين

مش جاي لاجل اتقاتل مع الصحبان





(5)



آه يا حبيبتي شفت توبك في الطريق مرهون

وشفت اسمك بالسواد .. والنور

مفرود على دكان بقاله وحدّادين ..

فارس صديق

فارس مطارد م الحصار

ماتفسحوش ..؟!

وسقطت في عيون النهار

وسقطت في قلب النهار







رسائل حب فاقدة الوعي



(1)



أندهلِكْ

ولا أكتب إسمك

ولا أرسم ورده؟!

لو كنت صحيح رسام

أنا كنت رسمتك نجمه ف حضن الكراسه البيضا

ورسمتك شمس تدفّي الورد البسّام

ورسمتك قمرا تبعد ضلّ الأيام السودا

لو كنت صحيح ملاّح

أنا كنت رسمتك بحر من الأفراح

والموجه

ضحكايه

وحكايه

وحدوته بتشرب

دمع التفاح





(2)



باركب سفينة نظراتِكْ

وامشي في مدينة ضحكاتك

واحلم في شلال الليل السهران، على خدّ كتافك

واحلم بكلامك ..

بتفرفط زي نجوم .. فوق فرع الرمان





(3)



.. وادخل المدينه المُحَبّبه

أدخل بلا موعد

واصادف الأحلام بلا موعد

نمشي بلا موعد

على موعد

ونتألّم سوا في سؤال مالوهشي جواب

سؤال دايمًا بيتجدّد

ودايمًا حروفه في الزحام ..

يتبدّد





(4)



عشاق ما نملكشي شيء

عشاق ما نملكشي بسمه تبلّ ريق

عشاق يتامى الفكر والفكره

عشاق في أرض الله بلا فكره

ما نملكشي القلم .. ولا الألم

ولا الورق .. ولا المخدع .. ولا العلم

ولا الفرحه .. ولا الآهه .. ولا الندم

ما نملكشي شيء

غير الطريق ..

صديق

بنبحتر عليه الغربه

ونتجمّع بلا صحبه

ونتفرّق بلا صحبه

عشاق





(5)



عيونك المدينه

ونا دخلت

تحت شلال كتافك بلا كلمه .. ولا حكمه

هجرت الحرف والكلمه

هجرت الصُّحبه والزحمه والشارع

هجرتْ نا نفسي اللي مش هيا

ودخلت متسلح ومتخفي

بحُبي المستخبي.





(6)



وجنب ساقيه سهرانه بتصلِّي لعود صبَّار

في أرض الصبي العاشق

وتحت عيونك أنا العاشق

رَإيت الحزن بيحاول ..

يخطِّي في أرض نهار

وجوه عيونك ..

بنيت لي دار.





(7)



.. وف شارع زحام جدًّا

شارع يخاف يدخله صاحبي القمر

لقيوا الحرس قلبي ..

مرمي كما موجه بلا بحر

مرمي بلا صاحب .. بلا شط

بتصلِّي فوقه الأغنيات،

بالعيون، بالصمت.





(8)



بلا سفينه في بحر عيونك

بلا مينا في بلاد عيونك

بلا مدينة حُب في عيونك

راجع أنا المشوار وباتأمل

تماثيل ورق

تماثيل حبر .. ع الورق

شفايف نفسها تحكي، ترفرف، تقول.

دراعاتِك

شبابك

شراع فرحتك

شوارع بسمتك وأصحابك وصاحباتك

المشربيات

والبيوت القديمه

والبوابات.. ورنةْ الغوايش وقسوة الحبال

والسواقي الحيارى .. والبراقع وىهة الموال

وغنوةْ الترحال.





(9)



بتهجريني .. وباعشقك

وتنكريني .. وباعرفك

وتندهيني .. وباسمعك

وانزف دموع الصبر وحدي فوق جدار الانتظار

وادبح الحب والفكره .. والورق والألم.





(10)



ح اخرج من مدينة عيونك الليْليّة لاكِني راح أرجع، أسير الانتظار.







عروسة البحر



ماشيه ع البحور بشعور محنيّة

بالشمس في كفوفها

والفجر في عيونها

ماشيه ع الشطوط بتضمّ في جروحها

وتلم ضحكتها

ماشيه لكين الحزن واقف وسط سكتها

والسنين تايهه في نظرتها

-إيه اللي ضايع يا عروسة البحر؟!

كان ردها:

الصمت واقف ناس..

جوّه دمعتها.

واتنهد القلب اللي مكوي

وانزوى تحت النهار.



لسه العرايس غرايب

وضحكة الصبّار على القلب اللي شايب،

دابحه الخلايق

لكين برضه الحبايب حبايب

والورده فوق سدر الجبل الجريح

واقفه بتتعايق

لسه قمرنا بالصهد متحنِّي

وكلامنا بيغني

ماحنا والصبح دايمًا

دايمًا قرايب



حناجرنا

إبني وسط الريح مطارحنا

بنغني ..

لاجل يبان الحق

لاجل يعيش الخلق

وتعود للبسمه الروح







1964



يا قضبان الورق الليلي

يا صُلبان الصمت ف مدخل حزني الشتوي

عصافير الكلمات بتزقزق وتمزّق

سجني الورقي

وبتحرق ضلِّي البردان

جنب حبيبه غريبه ف غربتها تملِّي

وتملِّي

ضلِّي البردان

جنب الدار بيصلِّي

بيصلِّي لكل الناس







رسالة



إحنا أطفال العالم ..

بنحب الكف اللي يسلِّم

بنحب الكلمه اللي تعلِّم

بنحب الليل اللي يغنِّي لقمره ولا يضلِّم

بنحب العصفور اللي يغنِّي..

ويجوع أيامه ما يتألم



إحنا أطفال العالم ..

بنحب الشمس اللي تدفِّي

ونحب اللقمه اللي تكفِّي

ونحب الشجره اللي تظلل على واحد حيران

ونحب الإنسان

إللي بيزرع أمله ضحكه لبكره ..

علشان ما تزورش الأحزان ..

أيّ مدينه

فيها الإنسان..

بيحب أخوه الإنسان.







المغربية



مروّح المغربية

والولاد ..

فوق شفايفهم

البسمه فرايحيّه

والنجمه ع البيوت ..

نجمةْ صيف منديّه

والقمر

بحتر سبحته..

على سدر المدينه، سبحته الكهرمانيه

وف إيده كام ورده

والنيل فارد دراعه الطويل ..

حبةْ نغم فضّه

والشوارع ناس .. وناس .. وناس

وف كل واحد كام بلد من الإحساس

يا بلدنا

يا بلدنا

يا بلد تنباس

يا بلدنا

ياللي حاضنه في القلوب الناس

الحُبّ رامي زهرته الخضره على الأوتار

على الأوتار

غنِّي يا صاحبي

غني للمدينه اللي سهرانه

لاجل ما يغيبش النهار

عَزَفْت ع الوتر

على ضحكة القناديل

نزل القمر

يشرب من شفايفنا .. فرحة المواويل

ويغزل معانا ضحكة الغ،سان

ويمسح ..

دمعة الأحزان.







سكة سفر



عمري كله صار مراكب

والمراكب ..

ماشيه تبكي ع اللي غايب

والآلام .. ليّا قرايب

يا حبايبي إحنا إيه ..

إحنا في الدنيا غرايب



إبتسم

إبتسم لليل يروق

تمشي الآلام وتفوق

يا حزن جوّاه

يا حزن جوانا

ح تفوق ف يوم .. تفوق .. تفوق

على ابتسامة الشروق



يا مراكب السهر

يا محمّله الأحباب

من على كل باب

وملففاهم في البلاد أغراب

صابر ومستنِّي

ليلي .. مكحلني

حزني .. وبيغنِّي



يا صُبح .. يا صبَّاح

إمتى تدوب لِـ جراح

وألقى الصحابا

دا بعد ما يغيب الألم ..

بنرجع غلابه

ولحدّ ما يدق القدم ..

والإيد ع الربابه

برضك غلابه .. غلابه



ماشيين في سكة سفر

لا لها أول .. ولا نجم في الآخر

دايمًا تطوّل .. والحزن بيسامر

وحديّا .. وحدينا

يا فجر في عينينا

ليه دايمًا .. دايمًا مهاجر

واحنا وراك ..
ماشيين في سكة سفر







وحياتك عندي



وحياتِكْ عندي

وحياتك

وسلامك لسه بالفرحه مدفِّي

أحضان يدِّي

وحياتك

وحياتك عندي

ما تغربنيش

ما تبعّدنيش

وتخلِّي أحلى ذكرى لأجمل حب تعيش



لو حَ نودّع بعض

برضه نفضل رسمة حب بتضحك فوق الورد

لو ح نودّع بعضينا

برضه حيفضل أخلى غرام

على ضيّ عنينا

لو كان لا مفر نودّع أمانينا

لو كان بالأمر .. نفرّق أيادينا

لو كانت قسمه

لو كان ده نصيب

وحياتك عندي

ما تغربنيش

ما تحسسينيش

إني أصبحت في دنيايا غريب

وحياتك

وحياتك عندي







أيوب



في البدء كانت الكلمه حنان

واتحوّلت مع الأيام جناين م الأمان

واتغيّرت مع الإنسان إلى إنسان

قمرُه بينزف ع الجبين أحزان



لا الدنيا دي دايمه ولا نبح الكلاب بيدوم

آدي صاحبنا بينتفض ويّا الرصاص ويقوم

ويرشّ تاني ضحكه ع القوم



حبيبتي، يا مكحّله العيون .. بسمرة السنابل

لا كنتي ناعسه ولا ناعسه الحزينه شكلها ف صوره

وادي ذنوب أيوب على الأوره

زيّينا بلا أحباب ولا كلمه مستوره



الله على شعر النسا همسة مسا تهزه

الله على شعر النسا المغسول بريحة شمس بتهزه

كل الجناين فتّحت من همس لمسة حب بتحسّه



كل القلوب زي القلوع شدّت ربابتها

الله يا ناعسه فوق شعورك بسمة الأوتار

بتصحِّي شوق المشتاقين والسهرانين

وتوشوش الأنغام عرايسها على الأنهار

وانتَ؟!

ياللي صراخك في القلوب موجه وطعمها .. مالح

غنِّيت مع الأحزان .. مع الأفراح



رُوح الغُنا مفتاح

يندب في ضلوع البيبان الخرسا يفتحها



أنا خدت يا صاحبي الغُنا غيّه ومش غيّه

طلع الكلام أيوب وناعسه .. والسنين هيّا

كانت سنين الحب والغيّه

والحب فارش نسمته بينهم

والمصطبه ..

فرشت ضلوعها ريش حنان ليهم

ملّس دراع أيوب على ضلع الغرام ملّس

لمست خدود أيوب بكام همسه

كان النجف كلمه على الأوتار بتدلِّي

كان النجف دفيان في أحضانهم

ولكن وإيه الحب راح يعمل لحامل همّ بينادي الغرام

لو كام جمل يتهدّ

أيوب جمل واتهدّ

وانشلّت الأنغام

أيوب كره نفسه وعاش للخوف

كما نبته بلا أحلام

أيوب حبس النجوم جنبه

خلِّى النسيم ويا الهوى أيتام

دمعه الكتير سيّال مع الأيام



وكئن نهر الحزن فاض ع الأرض

شِرب المغني دمعتين حُبّه

قال المغني دا الجمل يتهد

أيوب هواه هدّه

أيوب عشق ناعسه وكان العشق مش قدّه

عاد المغني بالكلام عايق

شَعر النسا منطور بيتعايق

لكنما هزّة شعورك فوق شعور الخوف بتتشابك

وبالأماره كانت إيديكي لفوق، لفوق، لفوق

وكئن كان صلب المسيح عاود في تنهيده نسيم مجروح

كئن كلمة حب رُوح بتنوح ولا بتبوح

كئن كلمة حب ما اتقالت

لكنها انشالت على نقّاله واتهانت ..

سكت المغني ..

قال الولد .. هانت

سكت المغني تحت ليل بارد

بارد بلون الصمت متنحّس صدا بارد

كئن زي الليلة إياها

ليلة "سعيد مهران" .. ما طخوه

كانت كتوف الناس بتتواحد

أما الكلام

ما كانش لا عايق .. ولا واحد

كان بلا صاحب

لف الحواري كان بيبحث عن أبوه ..

وكان أبوه غايب ..

ليلة سعيد مهران ما طخوه

وقعت شفايف بضحكتها وكلمتها في ليل شايب

عاد المغني يقول معاني بتنتني

مالت ربابته بالدموع .. قالت

طعم الغنا باهت

لون النجوم زيتي

غزل الملل خيط الضباب فستان ومتنغّم بلون أزرق

وبتلبسه ناعسه

نقش الغمام غمُّه في سكتها ..

يا هلترى مين .. مين تكون ناعسه

الريح حمام قام وحطّ وحام

لقط الكلام م الشمس والسكّه

شربت عيونه م النجوم خوفها

وانكتم باقي الكلام.



قال المغني اتفرجوا .. عبر السنين المُرّة.. والصبّار

ماشيين حزانا على خدود النهار

زارعين أسانا في الديار

كاتمين بكانا .. يا بكانا ع الأوتار

طرح الزمان ناعسه ونعست جوّه أيامنا

ودا كان مسير الصبر يحفرني ويحفر لي قبور صمته

عاري الزمان .. عاري ومتلحف بتنهيدتي

آه يا ومانّا يا ملازمنا

لبستنا توب الأمل حسره ..

عاري الزمان

عارك يا ناعسه كان ملازمنا

عاد المغني يقول معاني كلها عنا

لا بدّ من نسف الضلام بالعجز؟!

ضحكت رياح الموت بأنيابها

ضحكت عيون الصبر ع الصبّار

نزلت دموع الفجر مشلوله

شلنا رماد الفجر ف صدورنا

شلنا كفن فيه الزمن شالنا

والريح حناجر ع العليل تعوي

آه ع العليل .. ضلعه البليل طوبه على طوبه

طوبه من الأحزان بتتحاضن مع طوبه

سكت المغني شويتين

نطرت ربابته دمعتين

رعش الكلام على رمش حدوته

قال في أسى المقتول

أسى من يشوفك يا سعيد مهران على سفح الطريق مقتول

أسى اللي مال فوق الألم .. قال في تنهيدته:

معلش يا ناعسه!



ناعسه .. يا ناعسه يا حزينه

زي ما تكوني أميره ف حكايات السندباد

مخطوفه على مركب دهب

والضحكه فوق طرف الشفايف .. واقفه سجينه

واريح نبي

طبطب بكفه ع البلاد

ناعسه يا ناعسه يا حزينه

زي ما تكوني أميره ف حكايات السندباد



قال المغني وحدوه واحد مالوش تاني

صرخ الألم تاني

أيوب يا أيوب الألم مش سكه تمشيها

أبدًا ما بمشيها

دا ما كان حدايا بيت دهب أو ديّه أديها

غير كان معايا الصبر كان طيّب

يمكن أكون أيوب بَدُوب فوق الحروف واطرح عرق طيّب

طيّب أنا طيّبت قلبك يا زمان خوّان ..

شيّبت قلبي قلت لك طيّب

وما كان غريبه أي شيء محزن ولمْ طيّب



أيوب نطق .. كان كلمته مش فجر

ميّل وقال الصبر

إن كان حتبقى قسمتي في القهر

شلت الربابه فوق كتافي وكان لحافي الصبر

هزّيت وترها .. هزني م الصبر

هزّيت ضلوعي .. كان دموعي الصبر

مديت كفوفي صدّت دمعة فجر

أنا شفت فيها ضحكتك ناعسه

ناعسه .. وكان الأصل مش ناعسه



أيوب عليل من علّته اتنهد

قال العليل أصل الجمل ينهد

يا ريتني قادر ع الراقد صامت

يا ريتني ما حبّيت

ريت الألم ينساني ويصاحب جمل تاني

ناعسه .. يا ناعسه كل شيء متخفي بنسيبُه

مالنا ومال الغلب والتدوير وتنسيبُه

مالنا ومال الضلمه لو نامت وارتوت بالنور

دي حاجات كتيره مش ضروري نقول ونستفسر

ولا كان غريبه تنحني كل النجوم في الضهر

لكن غريبه ضحكتك إنتي

وانتي ما بين عين الرجال رعشة دفا ليهم

وانتي في مخدع خوف شاورت لهم على قلبك

قلتي هنا أيوب .. ومات أيوب



أيوب يا أيوب الألم مش سكه نمشيها

قال العليل دي دنيتي

عمر الألم فيها

من علته نزلت دموع ع الورق

رسمت رموشه بالعرق ناعسه ..

ناعسه .. وكان الأصل مش ناعسه

قال العليل .. ناعسه

كانت غريبه ضحكتك إنتي

إتهنتي ما هُنتي الحياه

إتهنتي ما هونتي

إندكّت الصلبان على نهودك .. ولم يبكي النسيم وردُه

واندكّت الصلبان على كتوفي .. مشيت بالحمل مش أدُّه

لكن حكايتي مش كده ..

قال المغني وحّدوه برضه

قلت الحكايه مش كده برضه

عاد المغني والربابه ع الطريق ناحت ما باحت غير قليل

عاد المغني والربابه زي غابه

زي الألم جوه النحيب بيجيب يودّي يجيب

قال المغني يا عجب .. صبرك عجيب

عارفك يا ناعسه

عارفك تمام



يا قلبي لا تصدّق

يا قلبي رُوح صدّق

كل النسا بتبيع شعورها لاجل الدفا يملا جناب أوده

كل النسا باعت نهود الصبر

إنهدّ يا عرش الحنان لازْرق

إنهد يا عرش النسيم واغرق

ناعسه في حضن الدفء بتغني غُنا الناعسين

ناعسه أهي نسيت ألم أيوب

واتعصبت بذنوب على الأوره ..



يا قلبي طير .. طير على وش الهجير

دوس الكلام المستحيل دوسُه

هات الأمل بوسُه ..

وامسح مرار الصبر

هات الكلام السخن

ما تجيش كلمه من حنك ما بيعرف التمييز

ما تجيش كلمه من قرار الجُبن

يا قلبي سوح سواح على سفح الجروح

وانشل صباحك قبل ما يضلّم



خان الكلام بعضه

بُق الحرام غضُّه

قال المغني مش أنا أيوب

ولا إنتي ناعسه

سدرك مرايه من الذنوب

تعكس سواد الليل في عز الضهر

شايف خيالي مترسم

عطشان وشاقق توب صبايا المبتسم

باندِب كما النادبين ..

واني سحابه بتترعش

لا ريح بيعصرها ولا ف عينها أمل

نهدك دبل ..

دبِّل شعور القمح عادت قشّ

والريح ورا ضلوع السحابه خشّ

حمل الرماد طعم الخساره

سكت المغني ..

قالوا النسا: "ملعونه خونة ست خوّانه"

خانت راجلها في كل حي ..



لكن على حيط الصدور أنَّه ..

كان قام "سعيد مهران" يتمنى

قال الولد إحنا ..

جدعان بلدنا ع المصاطب كلكم سامعين:

خانت راجلها لاجل إيه

إحكي لنا يا صاحب الربابه بالأنين.



عاد المغني بعد ما لفت ربابته كل حيّ وحيّ

لمّا المطر رشّ الدموع ع الأرض

والموت زحف ع الباب

هزّيت ربابتي بالغنا ف صمتي

ريحة الخريف شربت قرار راحتي

عشعش ورق أصفر على نهود البنات في الصيف

شرب الأمل م الخوف

ولا كان في أي كتاب قرينا عن أمل مَحْني

ولا كان في أي كتاب ح نقرا عن أمل مقطوف ..

إتفرجوا ياهْل البلد

البنت محلولة الشعور

زيّ الشجر طارح شهور القهر

والريح ما عاد ح يزوم ما عاد ح يقوم يزيح القهر

شوفتوش خريف أخضر في عز الصيف

شفته أنا م الخوف..؟!



إتنشلي يا ورده يا صبيّه

إتنشلي يا رياح يا قويّه

السكه دي هيا .. ومش هيا

ناعسه أهيّا .. بس مش هيا

قال المغني مش غريبه مِيت شبه بينا

أيوب في لحظة خوف نفض صبره

شال الربابه ف عز بلواته

طلعت لعين الشمس أنّاته

لكن ح تعمل إيه يا قلبي ف نعش

مكتوب عليه تُقل الزمن واكتر ..

وأكتر شويه من كده ..

دود الحقيقه اللي ناغز بالضوافر فيك



قال المغني يا زماني ليه ..

قشّيت صبايا الحلم م الرايحات وم الجايات

ولا كان منايا أتولد وسط العويل

أنا كان منايا فرد واحد بس .. بس يحسّ

ليه أنا حبيت وزوّقت النجوم بالهمس

حتى كمان كلمة غزل بتكش جوّه القلب

واللي هويته خان بأعذارُه

ولا كان لناعسه عُذر

كل النسا شاورت عليها بغدر

قالوا مهيش منّا

قال المغني فوق وتر أعور

قال اللي كان من غير خطيئه ..؟! وانكتم باقي الكلام



قال المغني معذره يا صحاب

نحكي شويه عن شعور ناعسه

ساعة ما هامت في الطريق تبكي

ساعة ما هانت نهدها لمسة جبان .. هانت

سكن الألم في بزها التاني .. لكنها هانت

جرّت عشيقها من هدومه

مدّت شفايف صبرها بالحب مدّت لُه

عصرت شفايف دفئها بالعشق وادّت لُه

طبع الحرام بوسَه

عرز الضلام ضلُّه على أيوب

الريح نفض قلبه المفضفض ع القمر

قال ماناش سهران ياللي عاشقين السهر ..

ولا ح تنفس في الخلا .. ولا ح ارفع دراعي للصلا ..

ولا زي البشر راح أوت

عيّط زيّ ما يكون إبن عام واحد

لمح بعينه كل إيد واحد ..

وحدها بلا حنك واحد .. بيتكلم

قال اللي كان من غير خطيئه ..؟! وانكتم باقي الكلام



قال المغني في ابتسامة صبر

أيوب أنا بقوة مشال صبري

أيوب أنا القوة

بس الرياح ساكنه وسدّت ع الأمل سكّه

إيه .. ليه يا ريح بتكتّف الغنوه

حزّم كلامك ع الطريق لوعه ..

طلع العويل حتى السما السابعه ..

مسكين يا أيوب ..

ح توب وترمي توب ذنوب ..

هوه الطريق هوه

وبتترجم بالطوب



وبينزرع دمعك في قلب الصبر صبّارُه

إيه بعد ايه نقول ونتحسر

زفّوا شبابك للنجوم السودا ما اتحسر

إيه بعد ايه ح تعيش وتستغفر

أيوب خلاص .. راح الخلاص

لكنما أجراس بلا إحساس

دقّت على الأسفلت ..

إيه الحكايه

إيه الحكايه ..؟!

قال المغني ناعسه هِي جايّه

حربايه لونها لون صفار الموت

حاضنه الخطايا ف كل شعرايه

ونا محنتي حمل الذنوب

فرش كلامه ع الطريق أجراس ..

دقّت لناعسه وهيا ناعسه ف الصراخ



الضرحه في عيونك يا ناعسه ألف شاب وبنت ..

يتنفّسوا لـ جراح

وبيدفنوا الأفراح ف موسم نَبْت



شاف القمر حالك وشالك فوق شيلانُه وحطّ

ناح على سدر الخريف

نوّاح بلا حتى غناوي نواح

عمره ما فكّر يفتعل أفراح

زفر الكلام عنقود حرير فضّه

قال للنسا ساعة المسا ح افرد شعور ناعسه

واغسل عيونها بهمستي

وامسح نهودها من عطور ورده



ياما القمر فرفط على سدرك كلام زي العنب

ياما القمر

بحتر خيوطه ألف فستان من دهب

قال المغني ع الربابه والغنا مخنوق ..

لكنما اللي انخض خضّة خوفه بتعضُّه

ولا يفتكر غير الغيوم

ولا يفتكر غير المداس فوقه

ما فوقتي يا ناعسه

سفّت عيونك م الغيوم غيمَه

أكلِت عيونك م الطريق شوكُه

ولا كان في ضلك حبّ

ولا عاش في قلبك ضلّ

ما فوقتي يا ناعسه ..



أيوب ترك ليكي، علاليكي النجوم كفْرِت

كفُرت من الإلحاح بصرخاتي

ناعسه يا ناعسه جوه نظراتي

ناعسه يا ناعسه ..

سبتي الفجر وانتي ف ليالي الحزن مش ناعسه

قصوا شعورك لاجل ما يشفى العليل

ضحكُم عليكي ..



يا حسرتي ه الحبّ في مخدع عطش ناشف

واتغيّر الإحساس أمل خايف

خايف يشوف لون الحقيقه في بدن أيوب

كرباج خساره في بدن أيوب

في قعده يغزل ملل

في رعشته صوت الأمل مدبوح

هزّ الربابه .. هزّها بينوح

هزة ضلوعه كركبة أوهام



أيوب يا أيوب الألم مش سكه نمشيها

إنشل صباحك م الجروح

أيوب سكت .. في سكتته روح الشباب عادت ..

تفرد جفون عين الألم تاني ..

تاني وتاني ناعسه أهي انهانت

معلش يا أيوب ..

إنشل صباحك م الجروح .. هانت.



أيوب لسانه م المرار أزرق

أيوب خسر طعم الألم حتى ..

أيوب خسر نجم السما الأعمى



حلِّي شعورك ..

حليها يا ناعسه يا ناعسه ف قلب حدوته

هزّي وتر دمّع في عز الفجر في شعورك

أما أنا ..

ح انده ف وسط الريح:

مين يشتري قلب النسيم مغزول حرير إسود

كل النسا في البلد قالت أنا

حتى مراتك يا "سعيد مهران"

قال: أنا ..



يا حسرتي .. دا قلبي محزنه

إطلع يا نخل الصبر

إطرح بلح أزرق في عز الفجر

واتسوّدي يا نجوم حزايني بحق

المحزنه ف قلبي أنا ..

ايوب أنا

وإن كان في عرض الدنيا دي واحد ..

شال الأمل ما اتهد

أيوب أنا

لكنما ناعسه ..

خرجت في وش الصبح

خلعت هدومها لاجل تشرب من نهودها الشمس

لكنها عادت خريفيّه ..



إجري يا ريح .. إجري بلا سكّه ..

خرجت حبيبتي في الربيع .. راحت ولم ترجع

غامت سما الأفراح ولا بتدمَعْ

يا رمش إفرد عودك المقصوف ولا تركع

يمكن خيوط الشمس تخنقني

يمكن شباب الشمس يغفر لي

لكن دا عاري .. عار زمن بيعيش

عاري يا عاري من كلام الناس ..

لمّا يزفّوا في الطريق عاري ..

إتفرجوا ..

غسل المطر طعم الخساره

غسل الندى قلب المحاره

يا هلترى ريحة المطر ديّا

ولاّ الخريف معصور في دنيتنا

يا هلترى شكل القمر هوّه ..

ولاّ الضيا مقهور في غنوتنا

يا هلترى ناعسه ماهيش ناعسه ..

ولاّ أنا باحلم ..

يا هلترى أيوب أنا .. ولاّ الهموم ناعسه



إحلم يا ريح احلم ..

واكسر قلاع الخوف

واغسل ذنوب ناعسه

واحفر على الاسفلت حدوتة المصري الجديد .. أيوب



صبرُه القديم راح ينفضُه ويقوم ..

ينفض عن الأيام حواديت الهموم

يرفع دراعه للنجوم

يرقص مع الأحلام

يخرج مع الأنغام

يسهر مع الأونار

ويلفّ المدينه كلها .. يخبط بكفُّه الحديد .. على كل دار



أيوب جديد أنا باتولد

فوق شفايف ولد

لسه بتعلم المَغْنَى وكام معنى



صرخ المغني وقال من على أعلى مدنه ..

حواديتنا فيها الصبر والصبر له معنى ..

نام يا عليل لليل .. والقمر .. واتحنّى ..

وإن فات عليك الصبح إبعد نظرتك عنه ..

وليه للصبح تتمنى ..؟!



ردّ الصبايا .. والصبايا في بلدنا غلابه ..

لكنهم بضحكهم .. غلابه

ردّ الصبايا

وَرْد الصبايا ع الصدور فتح

وإن كانت الحواديت في ليلنا بتجرّح ..

إطلع يا صبح

واكتب الحواديت م الأول

لا ناعسه ولا ايوب ولا حسن ونعيمه

ولا بهيّه وياسين

ولا قتله وقتّالين

ولا عنتر وعبله ..

إطلع يا فجر الصبح واتملى ..

راح نكتب الحواديت من الأول ..